Lucia Hoek, Coordinador di Actividadnan:
ORANJESTAD (AAN) – Lucia Hoek, Coordinador di Actividadnan na Centro Kibrahacha, tabata presente hunto cu e nuebe ganadornan di e sorteo di siman pasa, kendenan a haya tur e premionan cu nan a gana.
“Nos por bisa cu nos ta hopi contento con e pueblo a respalda esaki, e aña aki nos a bende tur nos bukinan, nos a sobrepasa e aña pasa y sigur nos ta hopi contento cu esey. Di parti di Kibrahacha nos ta bisa danki na un y tur cu a coopera, danki na tur nos miembronan cu sigur a hiba buki na cas y bende. Nos tin nos boluntarionan cu a yuda bende, y tur comercio, negoshinan pafo, hotel y tur hende cu a yuda nos, danki p’esey”, Lucia Hoek a expresa.
Lucia Hoek a menciona cu e mesun cen aki ta bay wordo inverti den nan miembronan, pasobra ta pa nan Kibrahacha ta traha, pa organiza actividadnan y cosnan nobo cu nan lo bin cu ne.
Hoek a reitera su palabranan di gradicimento, den nomber di Centro Kibrahacha y a bisa cu nan ta spera cu pueblo lo coopera cu ne, E otro aña.
Aworaki Kibrahacha ta cera, y solamente tin un summer camp un tiki mas chikito, un grupo di mas of menos 25 persona, depende di e dia, y e lo dura cinco siman, unda nan ta haci diferente actividad sea den e centro mes of subi bus bay keiro cu e clientenan. Dia 19 di Augustus Kibrahacha ta habri bek, y nan lo yama bon bini bek na tur e miembronan. Na September lo tin e prome actividad unda lo celebra Kibrahacha su di 39 aña di existencia, Lucia Hoek a informa.
{gallery}Centro Kibrahacha a entrega premio di e sorteo di siman pasa, na tur e nuebe ganadornan{/gallery}
