SKOA a celebra su Siman di Educacion 2025
ORANJESTAD (AAN) Di Dialuna 18 te Diahuebs 24 di October, SKOA a celebra su Siman di Educacion 2025, den cual manera semper, a trece inspiracion, innovacion y bienestar pa educacion.
Señora Anuesca Baly, Directora di SKOA, den entrevista cu Matutino DIARIO, a elabora tocante e siman aki.
Esaki ta encera e aspecto di profesionalizacion di e maestronan. E siman aki a habri Dialuna cu a pasa, cu un kick up, den cual tabata tin diferente invitado cu tabata presente, cabezante y docentenan di scolnan di SKOA, cu por a goza den e sentido di intercambia idea cu otro, pero tambe tabata tin dos discusion den panel, un di nan bao guia di Telefon pa Hubentud, unda nan a papia di ‘telefon den klas, si of no’ of ‘telefon na scol, si of no’.
Asina nos a habri’e y full e siman, e docentenan cu a participa den Erasmus Plus, ta dunando bek na comunidad, den e caso aki no solamente e comunidad docente di SKOA, pero e comunidad di tur otro school bestuur cu a desea pa ta presente den e tayernan di trabao, nan por a inscribi di adelanta y nan a haya diferente tema”, señora Baly a relata.
El a menciona cu nan a haya temanan manera: Lesamento den Klas, Music den Klas, Rekenen, entre otronan, DVG a colabora cu control di wowo, sucu, presion, unda tambe e bus di salud tabata presente.
“Un siman basta druk pa nos pero cu sigur ta duna hopi satisfaccion, pasobra atrobe nos ta ocupa formando nos docentenan, pa ta miho educadornan den klas pa nos muchanan”, señora Baly a remarca.
Nan a toca temanan tambe manera con pa anda cu alumnonan cu tin Autismo, of Dislexia, entre otro, pa duna e maestranan un tool pa con pa deal cu esaki. “Pasobra ora bo ta bira docente bo ta diña bo materia pero tin diferente aspecto aworaki cu ta hunga un rol. Ora cu bo tin un Klas lokal, tin diferente tipo di alumno den klas. Tin un bagage, muchanan cu tin problemanan social. Dus tur esakinan ta componentenan cu ta haci pa un docente cu tin mayoria di bez 28 of 30 alumno, den klas e ta bira dificil pa e duna su materia y atende cu tur otro tipo di situacion cu ta presenta”, señora Baly a señala.
{gallery}Directora Anuesca Baly satisfecho cu e siman aki di inspiracion, innovacion y bienestar pa educacion{/gallery}
