Corte di Casacion na Hulanda ta bay dicidi si acaso apelacion di Besaril ta laat of no

E abogado mr. Canwood a entrega apelacion contra decision di Hof

ORANJESTAD (AAN): Seis Hues di Corte Supremo na Hulanda lo bay atende cu e apelacion di Guilfred Besaril. Dialuna Hof di Corte Superior a dicidi cu e apelacion di Guilfred Besaril contra su sentencia no ta admisible y a bisa abogado mr. Canwood cu por apela. Den combersacion cu e abogado, el a duna di conoce cu el a apela y awor ta Corte di Casacion na Hulanda lo bay atende e caso y dicidi si e apelacion ta admisible of no.

   Besaril, a apela contra su sentencia di 13 Juni 2025 caminda Hues a condena Besaril na 20 luna di prison di cual 10 luna ta condicional cu 3 aña di prueba. Den e caso di kita propiedad, Hues a condena Besaril cu e mester paga 138.688 florin y si no paga e lo mester bay 1 aña den prison.

   Discusion riba admisible of no: Dialuna 20 October 2025, tabatin discusion entre Procurador General (PG) y abogado mr. Canwood riba si e apelacion ta admisibel. PG a remarca cu e apelacion no ta admisible. PG a bisa cu dia 13 Juni 2025, Hues ta haya Besaril culpabel y e mesun dia PG a apela e sentencia mientras cu dia 27 Juni 2025 abogado a apela.

   Na opinion di PG, ley ta bisa cu dentro di 14 dia mester entrega apelacion na Griffie di Corte. E ta haya cu e mail ta laat haci pasobra e email a wordo manda despues di oranan di trabao di Griffie. PG ta haya cu Hof mester declara e apelacion no admisibel.

1. Canwood a bisa Hof cu contrario cu PG, e apelacion ta haci na tempo. El a mustra cu segun ley, via email por haci esaki. E abogado a bisa cu ningun caminda ta para cu esaki mester sosode promer cu cierto ora. E abogado a mustra cu pa añas e mandamento di mail pa Griffie ta sosode caminda Griffie ta notifica e fecha cu a ricibi esaki y no e ora.

   Apela na Corte di Casacion: Hof ta haya cu e apelacion ta no admisibel. Na opinion di Hof, no a cumpli cu e termino stipula pa ley pasobra 4:00 pm Griffie ta sera. Hof a bisa mr. Canwood cu por apela contra e decision.

   Por a compronde cu tin un bruhamento den e asunto aki. Combersando cu varios abogado, nan ta di opinion cu enberdad no tin ningun caminda para cu e email mester drenta promer cu 4:00 pm. A contrario, e ley ta stipula cu e apelacion mester ta manda via email promer cu 11:55’or di anochi, sino e ta wordo considera laat.

1. Canwood a apela e decision di Hof y awor ta 6 Hues na Hulanda cu ta forma Corte Supremo lo bay atende cu esaki y dicidi si e apelacion ta admisible of no.