ORANJESTAD (AAN) -- Señora Julie Wever, Director di FCCA, a duna e discurso di apertura di e Proyecto Aruba Doet 2026.
“Ta un honor pa mi pa forma parti di e apertura di e proyecto Aruba Doet y cu e apertura ta tuma lugar den bario di Bushiri, Seroe Patrishi cu ta un bario di FCCA. Nos ta hopi honra pa esaki awe.
Locual ta haci e iniciativa aki, asina bunita, no ta solamente e proyecto cu ta wordo realiza pero ta e manera cu e boluntarionan pa haci esaki hunto.
Aruba Doet ta mustra nos cu ora hende, organizacion y comunidad ta uni forza nos ta logra cosnan bunita y importante pa nos pais.
Awe nos no ta solamente mehora un bario, pero nos ta fortalece tambe conexion entre e hendenan den e barionan di nos comunidad, cual mutuamente ta compromiso cu FCCA tin cu su barionan.
E sentimento di traha hunto y yuda otro y contribui na algo mas grandi cu nos, ta locual ta duna e proyecto aki berdadero balor. Cu e iniciativa aki, Aruba Doet, nos ta contribui tambe na mehoracion di e leefbaarheid di nos barionan, y esaki ta un di e compromisonan di FCCA tin.
Leefbaarheid den nos barionan no ta solamente caminda, edificio, nos ta referi na hende, adulto, famia, cu ta biba hunto den bario. Un bario unda tur persona ta sinti nan mes sigur, scucha y involucra.
Ora habitantenan di bario ta uni, ta haci un bario limpi, renova, yuda crea un ambiente mas bunita rond di nan; ta crea tambe un bario mas fuerte, mas conecta y agradabel pa biba.
Cu e Proyecto Aruba Doet, en cooperacion cu Universidad di Aruba, Cede ta mustra nos cu impacto real ta posibel ora conocemento, compromiso social y accion practico bin hunto.
Den diferente proyecto di bario, pa añanan caba studiantenan cu colaboracion di Instituto local, ta trece un cambio grandi den nos comunidad; esaki, ta demostra nos union, forza y hunto so nos p or logra esakinan. Awe, tambe nos ta anuncia oficialmente, cu FCCA y CEDE Aruba lo coopera mas estrechamente cu otro”, señora Julie Wever, Director di FCCA a indica.
