Director di Elmar ta mustra cu den menos di 10 minuut ya caba nan por instala camera

Compania ta usa nan Smart-Grid pa esaki

ORANJESTAD (AAN): Diamars atardi, director di NV Elmar, Anthony Irausquin a firma hunto cu Ministro Tjon e convenio pa asina e proyecto di instalacion di camera di seguridad rond Aruba por sigui.

   Fase #3 ta bay cuminza, y NV Elmar ta encarga pa instala e cameranan aki na forma vap-vap y ta haci uso di e ‘Smart Grid’ cu e compania a desaroya, usando nan wayanan di coriente pa transmiti señal.

   Segun Irausquin, esaki a marca un dia historico pa NV Elmar, y ta demostra cu awor e compania di electricidad no tey djis pa atende asuntonan di waya di coriente, instalacion di palo pa pone waya, of ta djis check meter, of haci reparacion na storingnan causa riba zonanan di coriente... awor nan a bay den epoca di tecnologia tambe y asina ta diversifica su servicio.

   E ta un dia historico pa NV Elmar cu nan ta cera un convenio asina.  E director di NV Elmar a splica cu desde comienzo di 2023 caba inesperadamente nan a haya un proyecto nan dilanti, pa den forma rapido bay instala 35 camera a lo largo di e ruta di bishita di Rey Willem-Alexander.  Irausquin a yama esaki como un tremendo ‘quick-start’ pa e proyecto piloto aki.  Y nan a logra di instala 35 camera den menos di 3 dia riba nan ‘Smart-Grid’ na tur lugar strategico pa cu e bishita di Famia Real.

   E forma cu nan a instala y e facilidad cu señal ta pasa, a pone cu NV Elmar a ricibi hopi bon feedback di e team cu tabata atende e proyecto aki na Cuerpo Policial.

   E sistema di ‘Smart-Grid’ ta uno cu NV Elmar a cuminza algun aña atras caba cune, cu e vision pa yega un dia na e sistema di cameranan aki.  E prome parti di e Smart-Grid tabata dirigi riba instalacion di Smart-Meters cu ta comunica via e Smart-Grid.  Awor a yega turno tambe pa instala camera tur rond di Aruba riba Smart-Grid.

   Na opinion di Anthony Irausquin, nan meta ta pa converti e ‘Smart-Grid’ di nan den un ‘Smart-City’ y e forma facil pa atende cune.  “Den menos di 10 minuut di tempo nos ta instala un camera y baha bek for di truck y sigui pa e siguiente,” Irausquin a splica.

   NV Elmar cu personal por move y adapta rapidamente segun peticion di KPA.  Si acaso por ehemplo tin un concierto un caminda, y Polisnan lo tin deseo di pone camera rond di dje, of pone camera extra... den un frega di wowo NV Elmar por instala nan, of haci cambio necesario.

   Aña pasa, NV Elmar cu un grupo local a bishita e Centro di Comando C4 na Bogota (Colombia), unda a mira e centro di inteligencia di camera mas grandi na Colombia.  Aki un solo sala grandi ta maneha 4.500 camera, y cu kizas pa awor nan lo a yega 5.000 camera caba.

   Esaki a dunabo un idea con bon e cameranan aki ta, con nan por yuda un sociedad y e industria primordial cu ta turismo, pa asina duna bishitantenan un sentimento di ta safe na Aruba.  Cameranan claro no ta preveni caso, pero nan ta yuda pa resolve hopi caso. 

   Irausquin ta hopi agradecido na Cuerpo Policial, tambe Utilities Aruba NV, Ministro di Energia, Ministro di Husticia, y e team di e compania di electricidad cu a haci esaki posible, y move rond cu team tecnico, team di ICT, y tambe team den backoffice, team huridico, cu a yuda nan yega y culmina e logro aki.