ORANJESTAD (AAN) – Director Marlon Croes, director di Departamento di Obranan Publico,
a elabora tambe riba e desviacion di rutanan entorno e ciere di e rotonde di Palm Beach.
“Loke ta hopi importante pa nos automovilistanan sa, cu e cambio di ruta, e desviacion lo bay mas intensivo, e biaha aki, compara cu e prome dos biahanan, cu nos a haci uso di parti di e cruzada y parti di e rotonde. Aworaki ta wordo cera por completo. Por ehemplo, si bo ta bin di Malmok cu direccion Oranjestad, lo bo tin cu drenta na haltura di Palm Beach Plaza, pasa via di Irausquin Boulevard, yega na cruzadanan di ex-House of Cheng pa bo subi Avenida Nelson Orlando Oduber, bay den direccion di Oranjestad”, director di DOW a splica.
El a sigui splica: “Si bo kier bay den direccion di Palm Beach noord, tin cu bay na man robes, pasa den e bario di Palm Beach, sigui e borchinan unda cu bo ta sali poco pariba di cruzada di Palm Beach mes, poco pariba di Dominos Pizza. Y si bo ta bin di Playa (Oranjestad) bay direccion Malmok, bo tin dos opcion: bo por haci uso di e ‘U turn cu tin traha riba Nelson Orlando Oduber, pasa den Irausquin Boulevard, y coi bek subi e Avenida N. O Oduber, na haltura di ex-Palm Beach Plaza, sigui bay noord. Tambe por coi via di Keito, drenta caminda di Palm Beach pa sigui e rutanan pa subi bek e caminda grandi. Y si bo kier bay den e areanan cerca di South Beach, nos tin e caminda habri patras di e Compleho Isla Bunita cu bo por yega ey tras ainda y sali bek na Irausquin Boulevard”, Director di DOW a informa.
