Directiva nobo pa Builders Club di Filomena College MAVO

Iriengelo Yamanica a bira president -  ORANJESTAD (AAN): Despues cu na April cu a pasa, Kiwanis Club of San Nicolas hunto cu directiva di Filomena College MAVO a tene nan prome evento

pa registracion di miembronan; dialuna studiantenan di e scol a haya oportunidad pa elegi colega studiantenan cu lo forma parti di e directiva di e club menciona.

   E idea pa bin cu e Builders Club di Kiwanis na Filomena College MAVO a cuminza door di e deseo di Kiwanis Club of San Nicolas; un club relativamente hoben pa yuda inculca liderato, boluntarismo y cooperacion den nos hoben nan.

   Un punto di bista cu ta alinea cu e mision y vision di e directiva nobo, lidera door di Juf. Raquel Lampe y Jorainne Oduber.

   “Nos studiantenan tin hopi potencial y nos kier crea conhuntamente cu otro partner nan, e plataforma pa nos studiantenan por mustra nan potencial”, ta locual cu Juf. Lampe a comenta den un di e prome reunion nan cu Kiwanis Club of San Nicolas.

   Ya caba na April, e studiantenan a organiza un Food Drive y a reparti tur locual nan a recauda pa yuda 20 famia den necesidad cu cuminda pa mas o menos dos siman. E cahanan a worde reparti na diferente scol den comunidad di p’ariba di brug. Cabesantenan cu a ricibi e donacion nan aki, a keda masha agradeci na miembronan di Builders Club of Filomena College MAVO.

   Dialuna, un total di 85 studiante, miembro di e club nobo aki tabata tin derecho di voto. E votamento a tuma lugar den pauze cu un esfera hopi ameno y positivo. Na final e resultado a keda como lo siguiente: Iriengelo Yamanica lo lidera e club pa e aña Kiwanistico 2021-2022 como presidente, Jean Ferrin Castillo lo fungi como vicepresidente, Rudlene Boezem lo ta e secretaria, Sharily Boekhoudt como Tesorera, Mireya Weller como e Editor/PR y finalmente Iriengely Yamanica como e Service Projects.

   Juf. Jorraine Oduber y Juf. Raquel Leocadia lo fungi como e docentenan cu lo conseha miembronan di e Builder’s Club y naturalmente miembronan di Kiwanis Club of San Nicolas cu tambe lo fungi como e conseheronan di parti e club.

   DIARIO a haya sa cu miembronan di Kiwanis Club of San Nicolas ta hopi orguyoso di por a brinda e oportunidad aki na e hobennan di Filomena College MAVO y ta sigur cu nan lo demonstra nan potencial maximo.  Manera e dicho ta bisa: “awo trabao tey cuminza”.