ORANJESTAD (AAN): Durante un Management Board Meeting recien, gerencia y sector managernan di WEB Aruba NV a cera conoci cu directiva nobo di Sport Vereniging WEB.
Director, Alfredo Koolman a desea e directiva completo hopi exito cu e trabao. Expresando cu SV WEB ta haci un trabao importante pa stimula e bon atmosfera entre empleadonan, no solamente na pia di trabao pero tambe durante actividadnan social. Tur esaki SV WEB ta haci a base boluntario cual ta di aprecia. E empleadonan di WEB mes ta contribui via nan salario un suma tur luna pa asina realisa actividadnan di sport y social cu SV WEB ta organiza.
A establece SV WEB como 52 aña pasa, esta na Maart 1971. Presidente actual di SV WEB, Miguel Cortes, a gradici gerencia di WEB pa e apoyo y a comunica cu nan ta aporta cu placer pa tur empleado di WEB. E tiki cu nos cada un ta duna por trece harmonia y positivismo.
Na aña 2002, bou di liderazgo di ex colega, Hubert Dirks, mihor conoci como ‘Moffy,’ a rebiba e organizacion y a formalisa statuut di SV WEB. Su meta tabata pa uni empleadonan di WEB pa medio di eventonan deportivo y social. Pa hopi aña el a presidi directiva di SV WEB. Bou di su presidencia a organiza e encuentro deportivo di mas grandi entre e companianan di Utilidad di nos islanan, esta EDCI cu te awe ta papia ariba e evento ey. E actividadnan social y deportivo pa e aña aki ta prometedor. Hunto por haci nan un exito; door di participa na actividadnan, pero tambe door di presenta ideanan, duna sosten, y contribucion.
