Director Desiree Helder a informa:
- Tema di enfoke ta “Dignidad”
ORANJESTAD (AAN) Na ocasion di a conmemora Dia di Adulto Mayor, dia 1 di October y celebra Luna di Adulto Mayor, durante henter October, señora Desiree Helder, Hefe di Directie Ouderenzaken, a convoca un rueda di prensa, pa informa tocante ki eventonan tin durante e luna aki. Tin tres charla cu ta wordo teni na JFK Education Center.
Helder a cuminza pa elabora riba e tema di e Luna aki, cual ta “Dignidad” y ta e enfoke durante e luna aki. Esaki ta dignidad durante embehesimento, pero tambe con pa fortalece e sistema di cuido rond di e adulto mayor, tanto esnan cu ta duna cuido formal como esnan cu ta cuida un adulto mayor den cas.
Directie Ouderenzaken ta bay organiza tres evento. Un ta dia 12 di October (Diasabra otro siman), cu ta na Education Center (JFK), sala 1 cu 2.
“Den e mainta aki nos ta bay enfoca riba adulto mayor mes, kico dignidad ta pa nan, y tambe nos ta bay duna informacion riba e importancia pa keda cu forza, e parti di movecion, nutricion, y pakico enberdad ta importante pa enfoca riba dignidad, na final di e bida di un adulto mayor. Esaki nos ta haci diasabra 12 un mainta pa tur adulto mayor cu por ta interesa, por acudi tambe na JFK-Centro di Educacion”, Desiree Helder a reitera.
E di dos encuentro ta dia 18 di October, unda e tema “Zorgverlenen” cu esnan cu ta e cuidadornan formal, di Adulto Mayor y lo enfoca riba pakico ta importante pa trata un adulto mayor cu dignidad, kico tur esaki ta encera, y tambe pa tene na cuenta nan mes cu nan estado di salud, nan estado emocional, con nan mes por distress.
“Pasobra no solamente e ta un trabao dificil, e ta un trabao pisa, y nan tambe ta siña deal cu nan mes emocionnan, nan mes stress, pa nan mes por sigui yuda e adulto mayor, di e manera miho posible”, señora Helder a subraya.
E ultimo presentacion ta dia 26 di October y durante e evento aki ta bay enfoca riba e cuidadornan den cas. “Mas tanto ta famia di adulto mayor, of tin ora bisiñanan, cu ta duna nan aporte y sosten na adultonan mayor, pa nan keda funciona debidamente, den nan mesun cas”, señora Helder a indica.
Pa nan tambe ta bay duna informacion tocante kico tur nan mester haci ora nan ta cuida un adulto mayor, kico ta e miho manera pa nan handle cu nan mesun trabao, nan mes emocionnan, y pa duna nan tambe e sosten necesario pa nan sigui haci esaki na e miho manera posible.
“Naturalmente, e deseo ta pa e adultonan mayor keda funciona miho posible den nan mesun cas, den nan mesun ambiente, pasobra esey ta loke nan ta custumbra cu ne, y esaki ta parti di e dignidad cu ta importante cu nan keda cu ne den nan bida”, señora Desiree Alders, hefe di Directie Ouderenzaken a remarca.
