Geraldine Kock a splica:
ORANJESTAD (AAN) Geraldine Kock, vicepresidente di Nine Live Aruba Foundation, den entrevista cu DIARIO a duna informacion di e actividad cu e fundacion ta bay tin e fin di siman aki.
El a duna di conoce cu Diasabra awo, den cuadro di celebracion di Dia di Bestia, nan tin nan adoption day, di 4 or di atardi pa 7 or di anochi.
El a bisa cu tin cantidad di pushi pa adopta. Aworaki nan tin dos fundacion cu ta “Pos United” y “Animal Welfare Alliance”.
“Nos ta dedica na solamente subi caya coi pushi y cacho, y steriliza nan. Nos tin hopi pushi y hopi cacho riba caya. Nos ta keda pidi steriliza, castra bo bestia. Esey ta hopi importante pa nan no reproduci pasobra esey ta e problema mas grandi cu nos tin awo. Nos ta haya, vooral nos hende grandi, pensionadonan, nan ta cuminza cria un, cria dos, despues e ta bira diez, despues ta bira 20. Awor nos tin un situacion den un cas, cu 76 pushi, anto e señora tin 86 aña, pensionado, cu tur e pushinan no ta steriliza”, Geraldine Kock a menciona.
El a bisa cu, vooral, nos hendenan grandi, si nan ta cuminza cria un mascota sterilize di biaha pasobra cu den un aña, un pushi por haya 16 yiu.
“Nos ta esteriliza nan y nos ta purba di haya cas pa nan. Pero ta hopi dificil, pasobra un cantidad asina di pushinan y nan ta grandi caba. Tin di nan ta shimaron, tin miedo, kiermen nan no ta bay acepta hende zomaar. Tin nan nos ta coi nan hiba nan na nos colony cats, pero esaki aworaki, ta full caba. Nos a yega un situacion cu nos no por tuma pushinan mas den nos colony cats. P’esey nos ta esteriliza y castra”, Geraldine a reitera.
Adoption Day: E Adoption Day lo tuma lugar awe, Diasabra 5 di October, na Nine Live Aruba Foundation, di 4’or pa 7’or. Eynan tin tur tipo di pushi: baby, junior, adulto, esun cu bo kier adopta.
