Kathleen Ruiz-Paskel:
ORANJESTAD (AAN): Señora Kathleen Ruiz-Paskel, Director di Dimas, den un entrevista recien cu DIARIO, a trece varios aclariacion tocante maneho di permiso na Dimas. E departamento ta monitoria e desaroyo constantemente y a tuma nota cu pa e Trayecto Cuarto tin hende ta registra y no a logra haya un dunador di trabou pa firma nan. E proximo paso ta pa conecta esnan cu ta na Aruba y no a logra haya un dunador di trabou ainda pero si ta dispuesto y tin e talentonan, cu nan por fungi den e trabounan cu ta den necesidad pa trahadornan nobo.
Señora Ruiz-Paskel a menciona cu segun e cifranan di Dimas, e cuatro posicionnan clave cu ta wordo pidi ta: personal domestio, (cuido di hende grandi, mucha of limpiesa di cas); trabounan di limpiesa (pa hotelnan, rbnb etc.); construccion; y e diferente disciplinanan di cushina (coki, asistene etc). “Esakinan ta e posicionnan cu nos ta wak cu ta mas den demanda pa e prome peticion y nos ta tene cuenta cu esakinan pa conecta e personanan cu un donador di trabou”, señora Ruiz-Paskel a remarca.
Señora Ruiz-Paskel a agrega cu e Trayecto Cuatro lo caba na December proximo y ta spera cu Dimas lo por logra conecta personanan cu a registra cu dunadornan di trabou cu ta buscando trahador. Di otro banda, señora Ruiz-Paskel a remarca, tin e localnan cu ta buscando trabou cu ta keda prioridad.
