ORANJESTAD (AAN) – Dilanti di DIARIO, Dialuna merdia personal di DIARIO, colega y ex-coleganan di redaccion a tuma despedida di nos colega stima,
y gran personahe di Aruba, Juby Naar, cu manera ta conoci el a fayece dos siman pasa, Diabierna.
Juby su Yiu Neomar a expresa palabranan di danki pa tur e añanan cu DIARIO a brinda Juby, sosten y amistad tur e añanan cu el a traha den nos corant, cual a nifica hopi p’e y pa su famia.
Di parti di coleganan di DIARIO nos a expresa cu danki na Juby cu a nifica hopi pa e corant aki y pa cada un di nos.
Juby tabata un bon colega, un persona alegre cu a gusta haci joke y cu tabata tin DIARIO na su curazon, y henter Aruba, y tambe un defensor ferviente di nos Idioma Papiamento, Aruba su carnaval, su cultura y ni papia mes di e amor cu e tabata tin pa e Distrito di San Nicolas.
Juby a trece pa DIARIO durante su largo trayectoria den redaccion, un balor agrega cu ningun otro corant na Aruba a logra di tin. El a laga un bashi den DIARIO cu manera su yiu corectamente a bisa, tabata su di dos cas, y e bashi aki no tin hende pa yen’e.
Awo tur dolor fisico pa Juby a keda atras, e sigur lo ta hunto cu Filomena den un lugar trankil, gozando di Dios su presencia. Sosega den paz di Señor, colega Juby Naar!
{gallery}Dilanti di DIARIO, staf, colega y ex-coleganan di redaccion a tuma despedida di Juby Naar{/gallery}
