Contracto colectivo LMA a bira arma contra servicio esencial pa Pueblo --- *Beneficio politico a mantene herencia di West Indische Compagnie ---*Sistema pa paga colonista ta haci Gobierno paraiso di ley laboral awe
ORANJESTAD(AAN)—For di momento cu e colonista Hulandes a yega Aruba como parti di decision di West Indische Compagnie, empleado publico a haci su entrada.
Areglonan mester a wordo alcansa cu e grupo di trahadornan di Gobierno, cu den hopi caso mester a laga nan famia atras na Hulanda, cu nan mester a haya oportunidad pa bishita.
E pakete di exigencianan social di e colonistanan na Aruba, ta bira mas comprendibel ora tuma nota cu leynan social basico di Aruba riba tereno di labor, SVB, a wordo tuma cu entrada di trahadornan si exterior den e economia nobo cu refineria a produci.
Leynan laboral a evoluciona hunto cu e comunidad local y mundial. E empleado publico, sinembargo, a keda cu su lugar special, debi na e hecho cu e ta traha pa Gobernacion di e pais, cu a pone un poco mas halto antes cu otro ciudadanonan.
Pero tabata tin mas motibo pa diferencianan grandi crece den e condicionnan di trabou den Gobierno y den sector priva.
E motibo tabata simpel. Despues di West Indische Compagnie a bira Gobierno Hulandes cu tabata maneha e colonianan te na e momento cu e paisnan mes a bira responsabel pa gobernacion.
Responsabilidad pa goberna no solamente a haci cu e Arubiano mes por a dicidi riba su Gobierno insular, pero el a nifica cu e Arubiano mes mester a paga pa su Gobierno y tur hende cu ta traha den Gobierno.
E aparato politico gubernamental, a haya poder pa tuma empleado den servicio sin cu e placa tabata bini di e cartera di e politiconan, cu a bira dunador di trabou sin e responsabilidad cu comercio tabata tin pa paga su trahadornan.
Cu politica a wordo hunga den asuntonan laboral di Gobierno, no ta algo cu por wordo cuestiona.
Naturalmente ora tin cupo di trabou habri, mescos cu den empresa priva, ta prefera hende di confiansa cu ta capaz pa haci e trabou.
Pero den empresa priva, mester mira cuanto placa tin pa gasta y si no tin placa pa gasta mas, ta cera e negoshi.
Den sector gubernamental no por cera e negoshi cu ta di Pueblo, pero sigur manera historia a demostra sigur na Siglo 21, por crea situacionnan impagabel den Gobierno y cu ta haci cu Pueblo mester paga pa loke no por.
E Contracto Colectivo di Trabou di trahadornan di Gobierno ta algo unico, cu a conoce varios cambio cu a produci voto pa e politiconan cu a bini cu e idea pa cambio.
Emancipacion di damanan a haci cu e empleado publico di sexo femenino por a keda na trabou despues cu e contrae matrimonio. Gastonan di Gobierno a subi pero a adapta na e sistema.
Resultado tabata entre otro pago di vacacion pa maternidad pero tambe un paro di salida continuo di damanan casa, cu tabata habri cupo di trabou den gobierno. E areglo ta husto pero ta duna prueba cu politiconan ta conciente cu tanto pa bon como pa malo, mester adapta leynan di colonistanan na situacion moderno.
Mientrastanto, diferencianan grandi den e Contracto Colectivo di Trabou pa trahadornan den servicio di Gobierno (ambtenaar) y e Contracto Colectivo di Trabou den comercio no a cambia.
Sindicatonan di Gobierno a bira un forsa poderoso pasobra ta mas facil decreta welga y exigi condicionnan den Gobierno, cu ta e caso cu den comercio local.
Cu e Contracto Colectivo pa Ambtenaarnan, LMA basa riba derechonan exclusivo di Amtebnaar, ta crea diferencia grandi entre trahadornan den sector publico y den sector priva, a bini dilanti tempo di Covid-19, ora salario di tur trahador na Aruba a baha y peliger grandi ta existi te awe cu ainda Covid-19 por haci cu mas trabou ta na peliger.
E expresionnan di e sindicalista Albertus, con por pone cuchio na garganta di Gobierno, pues Pueblo, cu un welga, ta papia pa su mes.
Na momento cu Gobierno welga, Aruba ta keda sin e servicionan vital cu comunidad mester, manera awa, electricidad, comunicacion, school pa muchanan.
E Contracto Colectivo pa Ambtenaarnan ta wordo mal uza sigur dor di politiconan cu ta tras di un grupo, cu nan a pone na trabou.
Expertonan riba tereno estatal, den sector priva y hasta den servicio di Gobierno, ta di acuerdo cu mester cambia contenido di e Contracto Colectivo di Trabou entre Pueblo di Aruba y su trahadornan, cu a hereda beneficionan di colonistanan Hulandes di West Indische Compagnie cu te awe ta dicidi pa Aruba!
