Diesun persona a completa trayecto profesional riba barberia

Ministro Wendrick Cicilia contento cu logro di ‘Proyecto AWE’

ORANJESTAD (AAN): Proyecto AWE a finalisa cu exito su prome trayecto profesional enfoca riba barberia, cu entrega di certificado na 11 hoben cu a completa e curso practico.

   Bao di e lema “Siña AWE, lidera mañan”, e iniciativa ta enfoca riba empodera e hobennan y conecta nan cu oportunidadnan educativo, desaroyo personal y preparacion profesional. E workshopnan a tuma luga dia 7, 14, 21 y 28 di september, cu participacion di hobennan entre 16 y 35 aña.

   Durante e trayecto, e participantenan a haya conocemento practico y experiencia “hands-on” den barberia. Tambe nan a ricibi guia tocante e profesion y e diferente posibilidadnan pa drenta mercado laboral of eventualmente cuminsa nan propio negoshi. Ademas di nan certificado, e hobennan a haya un starter kit pa nan por sigui practica y desaroya e habilidadnan cu nan a siña.

   E participantenan cu a completa e trayecto ta Ryan Tromp, Zahid Vrolijk, Riangelo Irausquin, Xakaii Aleyne, Jerome Richardson, Brayden Henriquez, Woodly Estime, Rudson Paesch, Guillermo Vital Fotel, Shereliz St. Jago, y Juan Valdez.

   Minister Wendrick Cicilia a felicita tur e participantenan pa nan dedicacion y perseverancia durante e trayecto. El a destaca cu cada hoben tin balor y potencial, no obstante e obstaculonan cu nan por a enfrenta den bida.

   “Nos mester bay den bario, busca nos hobennan y conecta nan cu oportunidadnan cu por cambia e rumbo di nan bida. Un oportunidad nobo por bira e prome paso pa un profesion, un negoshi propio of un futuro mas sigur,” Minister Cicilia a expresa.

   Minister Cicilia a extende palabra di danki na Alcides Marin, propietario di STASH, pa su disponibilidad pa brinda e curso y comparti su conocemento y experiencia profesional cu e participantenan. Su aporte a brinda e hobennan no solamente habilidadnan practico, sino tambe un miho comprension di e dedicacion, disciplina y responsabilidad cu e profesion di barberia ta exigi.

   Segun Minister Cicilia, brinda oportunidad no ta solamente ofrece un curso. Ta duna un hoben e espacio pa descubri su talento, fortalece su confianza y mira un futuro cu mas posibilidad. Pa logra esaki, ta importante pa Gobierno, sector priva y comunidad sigui traha hunto pa acerca educacion, guia y preparacion profesional na esnan cu mas tin mester di dje.

  Proyecto AWE tin como meta crea oportunidadnan real pa e hobennan desaroya habilidadnan practico, drenta mercado laboral, cuminsa nan propio negoshi of continua cu nan estudio.

  “Cada biaha cu nos brinda un oportunidad nobo na un hoben, nos ta inverti directamente den futuro di Aruba. Siña AWE, lidera mañan,” Minister Cicilia a conclui.