Diesseis miembro di Wardacosta a gradua den fin di siman

ORANJESTAD (AAN): Informacion for di Corsou ta indica cu 16 miembro nobo di Wardacosta di Caribe Hulandes,

a gradua di nan programa basico di ‘Junior Kustwacht Bemanningslid’ (JBK).

   Despues di un aña di training intensivo, cu desaroyo profesional, y crecimento profesional, 16 persona cu a uni na e programa di JBK na 2025 a logra completa nan training satisfactoriamente.  Graduadonan ta di Aruba, Corsou, y St. Maarten, incluyendo di Saba y St. Eustatius.

   E klas aki a marca un etapa significante pa Wardacosta di Caribe Hulandes.  Pa prome biaha un persona di St. Eustatius a completa exitosamente e programa di JBK.  Mas notabel ta cu e prome graduado di JBK di St. Eustatius ta un dama, haciendo esaki un logro historico pa tanto St. Eustatius como tambe Wardacosta.

   E miho graduada di JBK e aña aki ta un dama hoben di Aruba.

   E programa di JBK ta prepara e hobennan pa e diverso y exigente responsabilidadnan di e servicio di Wardacosta.  Ademas di e training maritimo y procedimentonan di bay abordo, e programa a inclui dunamento di prome auxilio, train cu arma di candela, desaroyo fisico y mental, y training extenso di leynan, duna den colaboracion cu e Opleidingsinstituut Rechtshandhaving & Veiligheidszorg (ORV).  E hobennan a ricibi training den derecho penal, proceso penal, con pa traha rapport, procedimentonan di aresto, y defensa personal.  E experiencia y e compromiso di ORV a contribui di forma importante den e preparacion profesional di e futuro miembronan di Wardacosta.

   E hobennan a ricibi experiencia practico tambe via di training y coremento di stage na varios isla abordo di e barconan cutter di Wardacosta.  E programa ‘Stronger Together’ na comienso di nan training a establece e fundeshi pa e balornan cu a keda wordo manteni durante e programa: siña, crece, supera retonan, y sostene otro.

   Awor cu a keda cla cu e programa di JBK, e 16 graduadonan ta haya nan promocion na rango di ‘Able Seaman’ dentro di Wardacosta.  Awor nan ta cuminza un capitulo nobo pa pone den practica tur nan conocemento y habilidadnan pa yuda proteha y sirbi comunidadnan a lo largo di costa y riba lama.

   Wardacosta di Caribe Hulandes ta expresa su gradicimento na personal docente di JBK, tambe tur departamento y unidadnan aprticipante, tambe e Base Naval Suffisant pa ofrece lugar pa e hobennan, y specialmente ORV pa nan balioso colaboracion y contribucion importante na e programa di training aki.  E colaboracion entre Wardacosta y ORV a sigui fortalece cada biaha mas y mas den ultimo añanan.  E graduadonan lo ricibi un biaha mas un diploma di JBK reconoci conhuntamente, cu ta resalta e importancia di e cooperacion aki.

   Wardacosta ta felicita e 16 graduadonan pa e logro importante aki, y ta desea nan un carera sigur, exitoso, y gratificante.