Diesiete famia a firma nan erfpachtakte oficialmente

Minister René Herdé

ORANJESTAD (AAN): Diabierna tardi, durante un ceremonia special na cantina di JFK Education Center, diesiete famia Arubiano a firma oficialmente nan erfpachtakte, un paso importante cu ta confirma nan derecho legal riba e parcela y cas caminda nan y nan famia a biba pa hopi aña.

E ceremonia ta forma parti di e esfuerso continuo di Gabinete AVP-Futuro pa sigui atende cu e situacion di habitantenan di casnan di pueblo cu durante añanan a cumpra nan vivienda, pero cu ainda no tabata den posesion di e documentacion oficial di propiedad pasobra e tereno tabata registra riba nomber di pais Aruba.

Desde cu Gobierno AVP-Futuro a asumi gobernacion, diferente ciudadano a expresa nan preocupacion tocante e retraso den e proceso administrativo pa regularisa e propiedad di nan cas. Gobierno a tuma e peticionnan aki seriamente y a traha hunto cu Fundacion Cas pa Comunidad Arubano (FCCA), Directie Infrastructuur en Planning (DIP) y Dienst Landmeetkunde en Vastgoedregistratie (DLV) pa haya solucionnan practico y asina acelera e proceso.

Minister di Infrastructura, Vivienda y Comunicacion, drs. René Herdé, a expresa durante e ceremonia su gratitud pa por representa Gobierno di Aruba den un momento asina significativo pa e famianan presente. Tambe el a comparti cu Prome Minister Mike Eman a hunga un rol importante den impulsa e fase final di e proceso aki pa logra cu e famianan finalmente por haya nan erfpachtakte.

Segun Minister Herdé, e proceso di regularisacion di casnan di pueblo ta un tema cu a existi pa hopi aña y cu diferente generacion di gobernantenan a traha riba dje. El a recorda con e tema aki ya tabata un prioridad den tempo di difunto minister Watty Vos, enfatisando cu hopi famia a warda hopi tempo pa mira e momento aki bira realidad.

“Pa hopi hende, esaki no ta solamente un documento. Esaki ta siguridad, trankilidad y un futuro mas stabiel pa nan famia,” asina Minister Herdé a expresa.

Gobierno ta considera e iniciativa aki como parti di un vision mas amplio pa fortalece acceso na vivienda digno y crea mas oportunidad pa famianan Arubiano. Banda di e regularisacion di propiedad, Gobierno ta sigui traha riba diferente iniciativa di vivienda, renobacion di bario y desaroyo di comunidad.

E ceremonia a tuma luga den presencia di representante di FCCA, funcionario di DIP y DLV, notario, miembro di Gobierno y famianan di e beneficiario.

Cu e firma oficial di e erfpachtaktenan awe tardi, diesiete famia mas a logra un momento significativo den nan bida: e trankilidad y siguridad di por yama nan cas berdaderamente di nan mes.