Den e contexto di aclarea tocante su retiro di Triple A:
ORANJESTAD (AAN) – Diego de Cuba, Presidente di Sindicato STA (Sindicato di Trahadornan di Aruba), a yama un conferencia di prensa Diaranzon, unda el a cuminza pa felicita tur e Conciudadanonan Venezolano biba na Aruba, cu a celebra dia 5 di Juli aki, e Independencia di Venezuela.
Seguidamente, el a splica cu el a yama e rueda di prensa aki, principalmente pa aclarea locual a sosode entorno su retiro for di Triple A, NV.
“Mirando e hecho cu tin hopi speculacion riba facebook y loke nos a scucha den prensa, como lider sindical di Sindicato STA, mi kier aclarea e asunto aki. E asunto di mi retiro tin su raiz, y un raiz bastante profundo. Na prome lugar mi tin cu bisa cu e manager di seguridad di aeropuerto, señor Lacle, mi no sa si e no ta gusta mi of e tin rabia riba mi, pero mi ta bisa ‘nos ta na 2023, bo mag expresa bo mes’. Nos no tabata tin problema cu esey tampoco.
Pero kico ta pasa? Desde cu el a drenta como manager di seguridad, mi a sinti un vibracion hopi negativo di su banda pa cu mi persona, y hasta tabata tin un momento cu e directora di Recursonan Humano, e tempo ey, a yama mi pa un entrevista unda cu e tambe tabata presente. Y ora mi a haya permiso di mi hefe, mi a bay ariba pa atende cu e reunion, y no a compronde di con mi ta haya liber pa atende reunionnan cu sindicato. E ora ey e directora di Recurso Humano a splike cu esaki ta hinca den CAO y cu ta un derecho cu e lidernan sindical tin pa bay atende reunionnan.
E no a keda mucho contento cu esey, pero ora nos a bin bek sigui traha, el a bisa mi hefe pa mi bay atende cune na oficina, unda el a bin reclama mi pakico mi tabata den e reunion”, Diego de Cuba a señala.
El a puntra Lacle di con e ta puntra si e tambe tabata hunto cune den e reunion, y a pensa pa su mes cu aki tin algo raro cune. El a puntra de Cuba ken a dune “green light” pa e ta den e reunion, y e lider sindical a contest’e “mi hefe”. Desde e tempo ey de Cuba a ripara cu e hefe di seguridad tin algo contra dje, pero e no sa kico precisamente.
“Ami no tin rabia riba ningun hende. Mi ta un hende comun y coriente, y mi no a teme ningun hende tampoco; mi ta teme Dios”, de Cuba a expresa. Den otro articulo por lesa mas di e declaracion di Diego de Cuba.
