Liberato Hoek, Hefe:
ORANJESTAD (AAN) – “We care for every one” ta e lema di e Siman di Ambulance” cu Servicio di Ambulance ImSan, ta celebrando e siman aki.
Hefe di Ambulance, señor Liberato Hoek, a bisa cu e aña aki ta bin cu enfoke riba mucha. El a comenta cu “ora muchanan mester di cuido di ambulance, e ta un tiki fastioso pa nan, pasobra nan ta wak un auto grandi, hende cu uniform, sirena tin cu zona duro, y nan ta haya miedo.
“Pero, tog p’esey nos a organiza un tipo di opendag, cu nos ta yama ‘Ambulance Experience Day for Children, unda nos ta bay tin diferente stacion, y nos ta mustra kico e trabao ta; tin simulacro di CPR specialmente pa mucha. Nos tin diferente actividad na nivel di mucha”, Hefe, Liberato Hoek a indica.
INVITACION PA TUR MUCHA:
Liberato Hoek ta invita tur mucha, Diasabra awo, na YMCA, na Dakota, di 9’or di mainta pa 2’or di atardi, pa participa den e opendag aki, cual ta completamente gratis.
Enfoke ta pa muchanan di edad entre tres te cu diesdos aña. Mayornan por trece nan yiunan libremente, pa nan haya un otro percepcion di kico ambulance ta.
“Nan por drenta den e ambulance, saca potret cu ambulance, nos ta bay haci cierto demostracionnan pa wak kico ambulance ta haci ora tin accidente, por ehemplo, y nan por combersa cu e profesionalnan pa wak kico nan experencianan ta.
CLAUSURA DI E SIMAN:
E clausura lo ta Diadomingo 24 di mei, ora cu nan tin un BBQ pa e trahadornan. Awe, nan tin catamaran tambe, señor Hoek a relata. E tambe tin palabranan di gradicimento pa tur esnan cu a coopera, tambe pa nan director Dokter Rajnherc, cu semper a support locual ta cuido di ambulance, y primordialmente tambe e personal, cu dia aden dia afo ta den e cuido. “Esaki ta pa nan, pa pone nan den e luz pa locual nan ta haci profesionalmente”, Liberato Hoek a conclui.
