Diasabra tabatin hisamento di Fli grandi na CB Playa Pabao

ORANJESTAD (AAN): Diasabra a tuma lugar na Centro di Bario Playa Pabao, cu tur e biento fuerte di entre 20 y 39 km/h, tin biaha cu rafaga mas fuerte, un Competencia di Fli.

  Principalmente ta trata di Fli grandi, pues ta adultonan tabata usa poder di musculo pa hisa y wanta linea.

   Net Diasabra mainta un awacero local a pasa y a basha hopi awa den e area.  Pero despues di un rato e nubianan a desaparece y asina e competencianan por a start.

   Julio Dirksz a indica cu aunke el a cuminza laat, nan a sigui toch cu e ritmo di e competencia pa asina nan a keda cla atardi prome cu solo a baha.

   Nan a escoge e fecha di 9 di Juli 2022 pa organiza e evento, despues di a consulta cu diferente team di Fli, pa asina a yega na un consensus pa organiza esaki riba e dia ey.

   A participa cu Fli den Categoria C cu ta tamaño di 1.50 meter te cu 2.50 meter.  Tambe cu Categoria D cu ta tamaño di 2.50 meter te cu 3.25 meter.

   E grupo tin pensa di organiza evento di Fli pa muchanan tambe den e vakantie grandi aki, pero nan lo anuncia esey despues.