Diasabra awor tin 100 cacho disponible pa publico bay adopta

ORANJESTAD (AAN): Luna Foundation ta cla pa tene nan ‘Adoption Day’, y esaki lo ta riba Diasabra 9 di April 2022, na Animal Care Clinic. 

Esaki ta situa na Paradera 177-A, cu ta keda net un tiki pabao di Citgo Paradera.

   Tin casi 100 cacho disponible!  Cacho grandi, puppy, y tambe esnan di mas edad.  Tur ta bao cuido di Luna Foundation Aruba na e sanctuario cu nan tin.

   DIARIO a compronde cu esaki ta un chens unico pa esnan cu ta buscando un mascota pa nan cas, pa asina dune tur cariño y amor cu e merece, pa haya un miembro nobo di famia.

   Bo amigo nobo ta disponible Diasabra awor, for di 12:00 pm te cu 4:00 pm na e Animal Care Clinic na Paradera.  Bay busca chens di conoce Reggie, bay conoce Moose, y mucho mas.

   Tambe tin cacho cu e nomber di Berlin, Garfunkel, Bucky, Duke, Ranger, Django, Bandit, Monique, Naomi, Ying Yang, Tess, y tambe Zyon.