Diasabra awor ta tuma lugar e Fundraising Bingo di Aruba Lions Club

ORANJESTAD (AAN): Diaranzon atardi a tuma lugar un conferencia di prensa na Aruba Lions Club, unda cu tesorero Magaly Dijkhoff a papia di e fundraising Bingo cu inicialmente lo a tuma lugar riba 25 di September, pero a cambia pa Diasabra awor dia 6 di November.

E Bingo a wordo cambia debi na e hecho cu varios miembro di Lions Club algun tempo atras a wordo afecta pa COVID-19.

“Tur cos ta keda mescos, esta e ta cuminza 7’or di anochi y e ta un Bingo organiza pa Bingo Aruba cu ta bay wordo transmiti via DIARIO TV, Bo Guia 88.9 y riba YouTube y Facebook di Bingo Aruba”, segun Dijkhoff.

El a sigui bisa cu tin premionan masha atractivo mes.

E premionan di cada wega ta di 200 florin te cu prome wega tin un premio di 200 florin te cu 2000 florin.

Ta premionan cu Aruba Lions Club ta gradici su sponsornan pe.

“Banda di e premionan aki nos ta bay tin premionan extra cu hendenan por gana, manera por ehempel un weekend stay y tambe 100$ pa gasta na un restaurant”.

Nos tin diferente rebendedor cu ta yudando nos, pa e Bingo bira un exito, segun e tesorero.

El a splica cu parts di e ticket di Bingo cu bo cumpra tin un ticket cu cual bo por gana un di e premionan extra.

Pa cada 10 Bingo cu un persona cumpra e ta haya 1 gratis.

Diabierna por cumpra e ticketnan di Bingo tambe na Lions Club den Engelandstraat for di 4’or di atardi.

E placa cu Aruba Lions Club ta genera lo yuda cu e tantisimo proyectonan cu cual e club ta yuda hendenan den comunidad cu mas necesidad, incluyendo nos grandinan.

Lions Club ta yuda entre otro cu rolstoel, cama di hospital, smile mobile pa esnan cu mester drecha diente of tin mester di diente falso.

Banda di esaki e club ta yuda tambe cu diferente otro proyecto, incluyendo un proyecto di Diabetes hunto cu Xavier University cu ta cuminza otro siman.

Lions Club tin mester di ayudo tambe pa restaura un monumento di Aruba Lions Club cu tin dilanti di aeropuerto.

E club ta yuda comunidad tambe via un proyecto yama Hunger Relief, caminda cu nan ta comparti paketenan di cuminda pa hendenan den necesidad.

“Nos tin alrededor di 50 famia cu nos ta yuda tur luna”, segun Dijkhoff.