Diasabra awo tin bunita proyecto “Ban pasa pret cu Huga Teca” pa muchanan disfruta y pasa bon

Presidente di e fundacion Yamila Hoevertsz ta splica:

ORANJESTAD (AAN) – Yamila Hoevertsz, presidente di Fundacion Hunga Teca a splica, den entrevista cu DIARIO, tocante e actividad cu tabata tin Diaranzon mainta.

Hoevertsz a indica cu nan tabata tin diferente wega di antaño, entre otro cana riba bleki, tira saco cu aroz den e buraco, y tambe tabata tin buki di pret.

E fundacion mes a traha tur e material, a pinta y verf nan. Nan a uza y re-uza material pa asina demostra e mayornan cu pa nan pasa pret cu nan yiunan nan mester ta creativo y no mester hopi placa.

Si e mayor ta bira miembro di Hungateca, tur siman por fia un coi hunga diferente, pasobra nan ta hopi caro.

Señora Hoevertsz a duna di conoce cu Diaranzon a cuminza cu votamento pa e “Long cable event” y pa participa por bay riba e facebook page di Hunga Teca. “E long cable event” ta cu un instancia ta organiza un dinner pa recauda fondo, y e fondo aki cu ta 40 mil florin ta bay duna na un organizacion y tur esnan cu kier participa mester traha un video di locual cu nan ta haci y bisa pakico nan mester gana e 40 mil florin, anto e pueblo ta vota y bisa cual ta e video cu nan ta haya mas leuk.

E dama a duna di conoce cu Hunga Teca a traha videonan na Papiamento, Hulandes, Ingles y Spaño pa asina por bisa pueblo di Aruba cu e fundacion no ta discrimina, nan no ta worry ki idioma e mucha ta papia, pasobra mucha ta hunga semper den e mesun idioma.

Señora Hoevertsz a agrega cu Diasabra awo, dia 12 di Augustus tin un tayer di pintamento riba canvas, y tambe algun boluntario di Hunga Teca ta hiba 15 mucha, cu nunca a haya e oportunidad di bay un lugar recreativo unda tin diferente bestia, gratuitamente. A haya sponsors pa tin un bus cu snacks pa e muchanan. E proyecto aki yama “Ban Pasa Pret cu Hunga Teca” y asina ta duna  muchanan di menos recurso, un chens pa disfruta tambe di nan infancia.