Diasabra anochi a cende luz oranje na Bestuurskantoor

Gobierno di Aruba ta uni den e ‘16 days of activism’

ORANJESTAD (AAN):  Dialuna 20 di November, Prome Minister Evelyn Wever-Croes a reuni cu Soroptimist International Club Aruba, hunto cu FCVR, UNHCR, HIAS riba e “16 days of activism” pa igualdad y siguridad di hende muhe y mucha muhe.

            “Un oportunidad pa nos TUR reflecciona, pasobra desigualdad entre hende homber y hende muhe ta existi ainda na Aruba y ta duna espacio pa abuso contra hende muhe y mucha muhe”, Prome Minister a enfatisa.

            E 16 Dianan di Activismo Contra Violencia di Genero ta un campaña internacional cu ta cuminsa riba 25 di November, Dia Internashonal pa Eliminacion di Violencia Contra Hende Muhe, y ta dura te 10 di December, Dia di Derechonan Humano. E campaña a inicia na aña 1991 pa  Women's Global Leadership Institute y tin un kalender di actividad pa enfoca riba e tema importante aki.

            For di e tempo ey, e ta un campaña global anual pa crea conscientisacion y mobilisa accion contra violencia basa riba genero, y ta envolve organisacionnan y activistanan rond di mundo. E meta ta pa enfatisa e conexion entre elimina violencia basa riba genero y mantene y enforsa derechonan human.

            “Durante e 16 Dia di Activismo, laga nos uni den e buskeda di un mundo liber di violencia y descriminacion. Huntu, nos por logra cambio, kibra e silencio y fomenta empatia. Cada esfuerso di cada ciudadano, ta contribui pa reenforsa husticia, igualdad, y empoderamento. Gobierno di Aruba ta uni den e 16 Dia di Activismo entre 25 di November y 10 di December. Nos compromiso ta pa cada ciudadano prospera den un mundo unda tin compasion y respet. Hunto nos ta construi un sociedad unda derecho y dignidad di nos tur ta wordo respeta y manteni”, Prome Minister a expresa.

            Pa duna sosten na e inicio di e 16 dianan aki, diasabra anochi a cende luz oranje na Bestuurskantoor na unda tawata presente CEDEHM, FCVR, UNHCR, HIAS, Soroptimist Aruba, Parlamentario Darlaine Quedez-Erasmus y Minister di Husticia Rocco Tjon cu a hiba palabra na e ocacion pa reemplasa Prome Minister na e evento special aki di Light Up Orange y uni na e campaña mundial di conscientisacion contra violencia y discriminacion di hende y mucha muhe.