DIARIO tambe a pasa bishita Heintje Ras  rato den Mina di Fosfaat

ORANJESTAD (AAN): Diasabra atardi ora cu e ciudadano Heintje Ras a drenta den Mina di Fosfaat hunto cu su yiunan y algun boluntario, e ora DIARIO tambe a bay abao.

   E yiunan lo keda pa 10 dia so.   Hunto cu un grupo di boluntario a bay abao pa yuda carga caha conteniendo comestible y cos di bebe.

   DIARIO como unico medio di comunicacion a haya permiso pa baha.  Esey a wordo otorga tambe na Hubert Tiel.

   Cu su camera, el a baha pa bay entrevista Heintje, y alavez duna Heintje Ras un man pa arma e tent pa asina e dos yiunan Alzachary y Alzachayla por drumi aden den e prome 10 dianan cu nan ta acompaña nan tata.  Tambe a arma un otro tent cu ta bira un sorto di deposito pa warda tur caha di comestible cu el a ricibi di Marinierskazerne Aruba, cu hopi cuminda special pa sobrevivi un hazaña manera esaki.

   Hubert a baha cu su carson y camisa, pero unavez a yega eybao, a opta pa kita camisa y keda lomba sunu debi na e cayente cu ta haci eybao.

   E nivel di oxigeno eybao ta na un nivel reduci.  E ora Heintje a hiba tur hende na un parti di e Mina, unda tin un piscina subteraneo di awa di lama.  A bula aden y esaki tabata bon frieu, y agradable.

   Tur hende a bula den esaki pa asina haya alivio di e calor.  Aki tambe ta uno caminda cu a sigui cu e entrevista cu a bay mas relaha cu normal.

   Na final, ta keda cu curpa muha y esaki ta un tactica pa keda alivia bo mes di e calor inmenso cu tin abao.  A cana un tiki mas den e adernan di e Mina, cu Heintje ya conoce for di su cabez.  Den henter su bida, como Tour Guide el a yega di hiba riba di 9.000 persona eybao, e.o. cantidad di Turista.

   A pasa den algun adernan, y yega na varios sala grandi cu tin subteraneo, cu ta un experiencia inolvidable pa fotografo Hubert Tiel.  E ta contento alavez di ta birando parti di e historia di e hazaña.

   Durante tur e dianan cu e lo ta den Mina di Fosfaat, el a bisa cu e lo ta haciendo oracion, haciendo analisis, y skirbiendo un buki encuanto e tunnelnan di e Mina.

   Pero e ta spera cu pueblo por coopera pa e por traha cu Mega Museo.

   Ora di sali bek, Heintje a acompaña Hubert te na e trapi, pa asina despedi di dje y subi bek.  El a invita DIARIO pa regresa na algun ocasion mas pa asina pueblo por haya sa con ta bayendo cu su hazaña.

   E ta un hazaña hopi duro!  Si tur luz paga eybao, ta un scuridad inmenso tin cu ni bo mesun dedenan bo no por mira dilanti bo wowo!   Tur druppel di awa cu bo ta tende ta sona eybao, ta wordo amplifica.  E ta hasta ponebo pensa cu ta un Horror movie bo ta mirando.

   “Mi tin admiracion, con como tata su atencion ta pa su yiunan eybao,” fotografo Hubert Tiel a comenta.  “Ni maske Heintje ta cansa, toch e ta keda alerto y vigilante cu su luz riba su cabez pa mira cu ningun bestia yega riba muchanan, si nan falta awa, si tin calor, pa hiba nan bek pa e piscina, etc.  E tin un amor asina grandi pa su yiunan.”  Esaki ta algo cu a acapara atencion di fotografo Hubert Tiel, y cu awendia no sa mira esey mas den comunidad.

   “Esaki ta cosnan cu hopi mayor na Aruba a perde, y ohala nan por mira loke Heintje ta haci como un ehemplo.”

   Si bo kier haci donacion, bo por haci esaki na Cuenta RBC Bank #77000001000257292.