ORANJESTAD(AAN)—Na varios ocasion DIARIO a trece dilanti, cu e wega sushi di AVP di 1985 pa haya poder gubernamental na Aruba pa medio di e causa di Status Aparte, cu nan mes a traiciona cu 12-8, no ta ripiti.
Mas ainda despues cu for di 2009, Mike Eman intencionalmente y contra tur rapport di expertonan cu mester garantisa bon gobernacion na Aruba, a gara poder cu e falsedad di deshaci di BBO y asina mata porvenir di Aruba, cu a scapa cu na 2017 e no a keda rehen di un farse politico.
Nos ta bon prepara pa weganan di AVP, manera for di 2018 nos a demostra ora nos a kibra e baile di mascarada di Mike Eman cu Nicolas Maduro y su banda di criminal cu a kere cu nan por haci Aruba nan cas.
Awe dos miembro di e grupo elitario di AVP kier cumpra curason di Aruba, pa abuso cu a yena aire di Aruba cu holor di santana cu a keda demostra cu cierto grupo no ta respeta, por continua.
For di 2018, ora rapportnan local y informacion internacional a cuminsa cay den nos man, nos a adverti AVP cu wega a caba.
AVP ta bon na haltura (miho cu cualkier otro partido of hende na Aruba) cu nos no mester di tin miedo di hende cu ta hunga cu sabiduria ni placa pa asina tapa solo cu un dede of cu un man.
For di 2018, nos a mustra AVP bon cla, cu a bira tempo pa Mike baha for di e nubianan caminda el a sconde su mes na 2017 ora pueblo di Aruba a bisa “weg”.
De bez en cuando, ora nos ta papia cu e grupo elitario di AVP, nos lo lansa un of mas palabra na otro idioma, pa asina nan corda cu no ta nan so a bay school pero cu nan ta biba na un pais cu Arubianonan bon prepara cu ta busca fortuna ni posicion pa nan subi trapi social y for di baranca halto, grita cu “pueblo tin hamber” of cu ta Mike lo a atende e pandemia di Covid-19 bon.
Ban cuminsa cu e “pueblo cu tin hamber” y mester tin hamber pasobra den rapport oficial Mervyn Wyatt tambe ta wordo culpa di tabata entre e miembronan di Parlamento di Aruba cu a permiti Mike y Benny haci y deshaci cu 1.6 Miljard di Aruba. Bin bisa nos cu ta mentira Mervyn, y nos ta yuda bo lesa un rapport y na e idioma Hulandes.
AVP a drenta cu mentira mas grandi den historia di Pueblo cu tabata e promesa di deshaci di BBO, cu rapport di Raad van Advies a bisa cu lo destrui Aruba. Bin bisa cu ta mentira!
Na 2013 Mike a bay eleccion cu mentira atrobe, mientras Hulanda tabata prepara pa pone Aruba bou supervision, loke a haci cu tur dokternan cu ta den club di AVP, mester a ocupa nan mes cu e salud di Mike, cu (ayyyy pocrecito) no kier a come.
Berguensa a cubri Aruba ora el a bay sconde den Fort Zoutman pa despues bin cu otro trampa cu tabata Citgo yena cu criminal cu autoridad di Merca tabata tira den prison.
Kico a pasa cu placa di pueblo? Pakico Aruba no por come den pandemia? Kico bo ta bin reprocha Gobierno, Selene? Ta bo so sa di Cuido Medico y Salud Publico? Si esaki ta e caso, pakico for di 2017 bo no a bay ranca Mike na su horea, bahe for di nubia, pa e bin bisa den Parlamento con el a hunga cu e proyecto Hospital entre otro.
Tristo Selene Kock, cu un dokter ta mira Mike duna Pueblo mal ehempel cu su comportacion den e pandemia di Covid-19. Kico Mike a haci den e pandemia? Bay hunga wega den boso grupo elitario, cu ta kere cu ta boso so a bay school?
Pakico Mike no tabata den Parlamento pa defende Aruba for di 2017? Pakico Mike a permiti supuesto persecucion cu e por a evita den Parlamento?
Rapportnan ta papia un gran berdad, cu cifra so por revela. Nomber di Gobierno Mike Eman y tur cu a sostene den Parlamento ta mara na deshonra, na critica di instancianan oficial cu ta bisa cu nan no a haci nan trabou.
Awor bin bisa cu nos ta practica mentira. E ora si tur hende ta haya sa “waar Abraham de mosterd vandaan haalde” y con AVP a bolbe despues cu Pueblo a pushe den olvido den decada 70, pa na 1985 probecha di loke Betico Croes si a alcansa.
Berguensa mester sigui?
