Dianan di training pa e encuestadornan cu ta subiendo caya pa Censo Economico

ORANJESTAD (AAN): Diabierna tabata e prome dia di e Economic Census 2023 na Aruba! 

Y prome cu esaki a socede, tabatin varios sesion di entrenamento den oranan di atardi.  Esaki tabata pa e encuestadornan ta bon prepara pa e encuestanan, pa asina tur cos bay lo mas eficiente y efectivo posible.

   E hefe di National Accounts di Oficina Central di Estadistica, Jonathan Upegui, tabata duna e preparacionnan aki.  Den un entrevista, el a bisa cu e encuestadornan lo bay ricibi nan Tablet computer, nan Badge oficial di identificacion, y asina subi caya pa bay bishita negoshinan riba Aruba.

   Nan lo presenta na e negoshi pa asina haci e encuesta mesora.  Sinembargo si acaso e persona encarga na e negoshi no tin tur e informacion, lo haci un cita pa regresa riba un otro fecha pa e ora ey si haci e encuesta completo.

   E encuesta ta encera preguntanan di e.o. loke ta e actividad economico cu e negoshi ta haci, e productonan cu e ta ofrece, e.o. loke e ta bende, of e servicio tambe, y tambe haya sa kico ta e producto of servicionan cu e negoshi ta usa pa funciona y produci.  Aki bo ta menciona e.o. cu e negoshi ta haci uso di awa y coriente pa produci su articulo, of tambe si e ta usa otro negoshi di limpieza pa haci e servicio cu nan ta duna en general.

  E datonan cu wordo colecta lo usa pa mira estructura di economia di Aruba, cada tanto aña e tin di wordo haci.  No obstante cu e structura na Aruba no ta cambia hopi, toch tin di haci e encuesta cada tanto aña pa ta sigur cu e datonan ta na e nivel mas halto cu por comparti esaki na forma agrega internacionalmente.  Pues nunca ta haci esaki den forma individual.

   E resultado lo bay duna un update di e database di negoshi, y por usa e estadistica aki pa ofrece diferente categoria di informacion.  Pues lo bo por haya sa cual sector economico ta mas grandi, cual sector economico ta cay den categoria ‘niche’, pues e sorto di informacion ey lo sali afo.  E por ta beneficioso pa hendenan cu kier habri negoshi, unda bo por mira cual distrito ya caba ta satura cu e tipo di negoshi ey (por ehemplo Restaurant), y e empresario lo haya un idea unda kizas ta mas ideal pa habri.  Of kizas e lo por mustra cu tin un motibo di con den cierto area ya caba tin mas negoshi similar, pues tin demanda eynan pa opera algo asina eynan.

   Pues data cu lo ta beneficioso pa cualkier empresario of comerciante nobo cu kier start un negoshi den futuro.