Dialuna e peak di coriente na Aruba tabata 150 MW y na Curaçao tabata 138 MW

Diamars a yega na 152 MW

ORANJESTAD (AAN): Manera DIARIO a trece dilanti caba den su edicion di Diamars, cu e compania WEB Aruba NV tabatin su produccion di electricidad bayendo den full escala, pasobra segun experiencia semper e prome dos siman di September ta calor y pueblo ta usa mas aparato y esaki ta trek mas coriente.

   E peak promedio di produccion di energia den plantanan di WEB Aruba NV ta di 135 MegaWatt.  Den pasado, principalmente na aña 2015, e peak tabata entre 140 y 145 MW.

   Dialuna tabata e prome biaha den historia di produccion di energia na Aruba, cu e peak a yega na 150 MW.  Esaki tin di haber cu e hecho cu riba Dialuna tabata hopi calor mes, y aumento den demanda di energia ta e consecuencia.

   Situacion na Curaçao: Mientras tanto e compania Aqualectra na Curaçao tambe a conoce un peak den demanda di coriente, esta di 138,5 MegaWatt.  E peak aki a yega na dje riba Dialuna 5 di September banda di 10:00 pm.

   Segun e compania, esaki ta mucho mas halto cu e demanda record cu a keda registra na 2016, esta di 133 MW.

   Aqualectra a admiti, cu e demanda record aki a sobrepasa e 135 MW na capacidad cu e compania tin disponible actualmente pa opera safe y cu un margen di seguridad.  No obstante, e demanda historico aki, Aqualectra a logra toch pa suministra e isla di Curaçao cu coriente, sin cu nan mester a aplica e sistema di ‘schakel’ pa spaar coriente.

   Pa colmo e dianan ey no tabatin hopi biento, pues no por a conta cu un produccion halto di e mulinanan cu tin instala na Curaçao tampoco.  Dialuna mes, apenas e mulinanan a contribui cu 3.5 MW na e total di 138,5 MW produci.

   Capacidad na Curaçao: E capacidad total cu Aqualectra tin na e isla ta:

Mashin convencional: 151 MW.

Turbina di Gas: 22 MW.

Biento: 46,5 MW.

   Sinembargo aworaki tin dos unidad di produccion di Diesel cu pa un periodo largo ta for di funcionamento, y te October lo keda cla y ta bek den funcion.  Ademas di esey, tin un otro produccion di Diesel cu ta pasando den un mantenimento grandi.  E unidad ey lo keda cla te Januari venidero.

   Pesey Aqualectra ta adverti cu si e peak pasa e capacidad cu nan por mantene, e ora nan tin di benta algun bario for di e red pa asina cuminza cu un sistema di schakel.

   Na Aruba a prepara pe: Manera a ser treci dilanti durante un conferencia di prensa luna pasa, hecho ta cu WEB Aruba NV si tabata prepara pa enfrenta e peaknan aki di September.  Pesey mes nan a duna e Turbina di Gas su mantenimento necesario, pa asina e ta den servicio y yuda wanta e peak cu Dialuna a yega na 150 MegaWatt.

   E ta un decision cu aworaki por mira tabata esun corecto, y di e forma ey e compania no mester a corta coriente ningun caminda.  Hecho si ta cu den algun bario tabatin storing, pero esey a cay bao di NV Elmar.

   Peak di Aruba vs. Curaçao: E dianan aki a tende algun hende ta puntra nan mes, con por ta posible cu e peak di Aruba ta mucho mas halto cu esun di Curaçao.  Nan no ta compronde, pasobra Curaçao tin mucho mas habitante.

   Enberdad, segun Censo di 2020, na Curaçao tin 155.000 habitante ta biba.  Censo 2020 ta mustra cu Aruba tin solamente 107.000 habitante.

   Pero si bo mira e infrastructura di complehonan grandi, e.o. Hotel- y Condominium cu tin gespat rond di Aruba, lo bo compronde mesora cu e demanda di coriente ta mucho mas hopi.  Fuera di esey, riba e isla aki tin mucho mas Shopping Centers, negoshi, y empresanan den zona comercial cu ta haci uso di hopi electricidad.

   Peak a yega 152 MW:  Mientras tanto, WEB Aruba NV a divulga cu riba Diamars, e produccion di coriente na Aruba a conoce un otro peak historico.  El a subi te na 152 MegaWatt.

   Kizas tin algun hende ta pensa cu WEB Aruba NV lo ta contento ora demanda y produccion di energia subi, pasobra esaki lo nifica “mas placa pa nan”.

   Sinembargo, esey no ta e caso!  E motornan RECIP tin un capacidad maximo.  Pa por wanta un aumento di demanda temporal di energia, esaki lo rekeri inversion extra pa motornan cu capacidad mas grandi, pa solamente algun ora mas calor den luna di September.

   Aparte di un consumo mas halto di e HFO Oil costoso, esaki no ta un inversion sostenible.  Pesey ta recomendable pa semper, tambe ora cu ta dianan di calor, abo na cas of oficina, sea conciente y spaar energia