ORANJESTAD(AAN): Riba Diahuebs 2 di April Universidad di Aruba (UA) ta bay tin un anochi di informacion pa presenta nan programa di MBA(Masters of Business Administration), cu un biaha mas ta cla pa cuminsa.
Durante un conferencia di prensa Rosabelle Illes, profesor na UA, a splica cu e programa ta wordo realisa hunto cu nan partnernan di University of South Carolina.
“Tur aña nos tin docente y profesornan di Merca ta bishita UA pa asina duna e sessionnan aki di MBA na nos candidatonan”.
Aworaki dos aña a pasa caba cu nos tin e siguiente grupo cu nos ta bay yama bon bini y si tin persona cu ta interesa pa bira un candidato, nos ta bay duna informacion Diahuebs awor durante di e ‘Info Night’, segun Illes.
El a splica cu e MBA ta pa lidernan den nos comunidad cu ta desea di eleva nan carera, pa medio di obtene un Masters Degree den Business and Administration.
Segun e profesor, e studiantenan pa MBA ta bin for di sector publico y sector priva den diferente area.
Algun ehempel ta personanan di e sector financiero, medico, hotelero, di educacion, huristanan y tambe personanan cu tin nan propio negoshi.
“Ta hopi importante pa menciona cu un di e rekisitonan ta dos aña di experiencia den maneho, sea bo ta un manager of un supervisor, of bo ta lidera un departamento of proyecto”
E ta importante pa bo tin e background aki pasobra e sesionnan hopi biaha ta discusionnan y analisisnan di casonan local y internacional.
E ta bira mas un discusion y no simplemente un les cu ta wordo duna.
Si bo tin e background aki bo por trece bo experiencia como un lider den nos comunidad y asina bo por contribui cu bo experiencianan na trabao y esey ta haci eingelijk e les di MBA cu ta diferente na otro tipo di Masters, segun Illes.
El a sigui bisa cu riba e anochi di 2 di April ta bay tin studiantenan tambe cu actualmente ta finalisando e programa y nan tambe ta bay ta na palabra pa papia di nan experiencianan como un studiante.
“Banda di esaki nos ta bay papia di e rekisitonan cu hende mester tin pa aplica, kico ta pasa despues cu bo aplica, kico ta tur e documentonan cu bo tin cu entrega y tambe lo papia di e proceso di entrevista, unda cu un comite di seleccion lo dicidi kendenan lo bira e candidatonan”, segun Illes, kende a splica cu e cuponan ta limita.
Esnan interesa pa cursonan manera, Corporate Finance, Entrepreneurship and Innovations y Cyber Security Fundamentals por subi riba e website UA.aw, unda cu bo ta selecta e facultad di Hospitalidad y Turismo, despues bo ta selecta e program di MBA y eynan bo ta haya tur informacion y e programa di e cursonan cu ta planea pa e siguiente grupo.
