‘Light It Up Colorful’ na Bestuurskantoor lo ta Diaranson venidero
ORANJESTAD (AAN): Luna di april ta dedica na conscientisacion di autismo. Na aña 2007, Asamblea General di Nacionnan Uni a designa dia 2 di april como Dia Mundial di Conscientisacion di Autismo cu e meta pa crea consciencia mundial tocante autismo, promove comprendemento, proteha derechonan di personanan cu autismo, y stimula diagnostico tempran, inclucion y sosten den tur comunidad na mundo.
Carolina Span di Fundacion Autismo Aruba (FAA) a declara cu e evento di luz, “Light It Up Colorful” na Bestuurskantoor, contrario na añanan anterior, lo tuma luga dia 1 di april, cuminsando pa 6:30 di atardi, mientras cu iluminacion cu luz lo cuminsa pa mas o menos 7:00 di anochi. Tur aña, e acto simbolico aki ta refleha e colaboracion entre FAA, otro organizacionnan cu ta traha den e mesun campo, y Gobierno di Aruba.
Señora Span ta invita henter comunidad pa tuma parti den e momento significativo aki y uni na e causa pa sigui traha pa un sociedad mas comprensivo, inclusivo y yen di respet, unda tur hende, sin distincion, por sinti nan mes balora y acepta.
