Diahuebs 16 di maart ta recorda cu 47 aña pasa Parlamento di Aruba a aproba nos Himno y Bandera

“Den un pais, unda ta reina e deseo ferviente pa sali for di e constelacion Antiano y bira un pais autonomo den Reino Hulandes,

bo mester promove e simbolonan di union, identidad y libertad, unda cu cantando bo himno bo ta expresa bo amor pa bo pais y hisando bo bandera bo ta inculca patriotismo bao di bo pueblo”. 

Desde añanan 30 y durante varios decada Aruba tabata sinti su mes incomodo den un structura estatal cu no tabata faborece nos pueblo. Alabes e trato cu Aruba tabata haya no tabata duna espacio pa sigui bao di e structura aki. Ta p’esey e pueblo na varios ocasion a manifesta su deseo pa caba cu e dominio aki y tabata boga pa Aruba haya un status autonomo den Reino Hulandes. 

Union di e pueblo Arubano

Lamentablemente e partidonan politico di e temponan ey no tabata uni den nan pensamento y accionnan, cual a impedi pa logra concretisa e deseo di pueblo. Y a dura hopi aña prome cu Aruba a haya un politico visionario den persona di Betico Croes kende desde principio di su carera politico a pone como meta pa trece union bao di e pueblo Arubano. 

Betico Croes, den cuadro di su strategia pa concretisa e deseo di nos pueblo pa su libertad, a mira den introduccion di himno y bandera instrumentonan clave pa logra trece union den e pueblo Arubano. Un union cu a wordo fortifica mediante e pensamento cu tur esnan cu a nace aki y otronan cu a bin Aruba y haci e isla aki nan hogar y cu ta stima e isla aki ta Arubiano. 

Den e luz di e desaroyonan aki y teniendo cuenta cu deseo di pueblo pa haya mas libertad politico y treciendo e union bao di nos pueblo, Gobierno di Aruba riba proposicion di Consehero General Betico Croes y diputado Nelson Oduber a dicidi di duna Aruba su propio himno y bandera nacional. 

Comision Himno di Aruba

Asina pues un Comision di Himno a ser institui dia 21 di januari 1976 cu a haya e tarea pa conseha gobierno si mester haci “Aruba Dushi Tera” himno nacional. E comision tabata consisti di e siguiente miembronan: Maybelline Arends-Croes, Rufo Odor, Juan Chabaya (Padu) Lampe, E. Bennett, Hubert (Lio) Booi, Rufo Wever y secretario Juan E. Wever.

E comision a duna su recomendacionnan na Gobierno Insular y dia 16 di maart 1976, esta un dia manera awe 47 aña pasa, Eilandsraad di Aruba a aproba ‘Aruba Dushi Tera’ como himno oficial di Aruba. 

Comision Bandera di Aruba

Alabes dia 21 di januari 1976 Gobierno di Aruba riba proposicion di Betico Croes a nombra un comision cu tabata tin como tarea pa organisa un concurso den pueblo pa diseña un bandera pa Aruba. E comision tabata consisti di e siguiente miembronan: Julio Maduro, Wouter van Romondt, Ronald Donk y como secretario Juan E.Wever. Cu ayudo di un experto di Merca (Flag Research Institute, Boston) a logra un diseño final di e bandera pa Aruba. Mescos cu tabata e caso cu e himno di Aruba, riba dia 16 di maart 1976 Eilandsraad a aproba e diseño di e bandera oficial di Aruba. 

Proclamacion oficial di Himno y Bandera

Dos dia despues di aprobacion di tanto nos himno como nos bandera, esta 18 di maart 1976, e acto oficial organisa pa Gobierno di Aruba a tuma lugar den Wilhelminastadion, caminda a proclama oficialmente nos Himno y Bandera y esaki den presencia di miles di nos ciudadanonan cu a acudi pa demostra nan amor patrio y nan alegria cu Aruba tin awor tambe su propio himno y bandera. 

Cu e introduccion di himno y bandera Betico Croes a pone un piedra firme pa e fundeshi pa construccion di pais Aruba. Cu e himno y bandera e pueblo a sinti cu realmente nos ta un pueblo cu balor y honor y esaki Betico tabata kier pa e pueblo por tin su propio identidad y simbolonan di libertad.

Riba e dia di awe Partido MEP ta felicita henter pueblo di Aruba y ta gradici Betico Croes y Nelson Oduber pa nan vision y curashi y cu awe nos tin nos propio simbolonan di union y libertad.