Norman Thijsen di Fundacion Savaneta Aruba ta invita
ORANJESTAD (AAN): E aña aki, Savaneta ta e anfitrion di Open Monumentendag cu lo tuma luga Diadomingo 7 di juni. Fundacion Savaneta Aruba ta e organizacion cu ta yuda organiza y coordina e evento aki na Savaneta. Señor Norman Thijsen di e fundacion a elabora riba e programa cu lo tin e dia aki.
Apertura y clausura di e programa lo ta na Funari. Aki lo tin hopi actividad, entre otro, charlanan y un cushina bon surti cu cuminda crioyo. Ademas, tin 5 otro luga cu por bishita pa experencia e historia di Savaneta. Entre otro, banda di lama, lo tin workshop (“Programa Piskechi”) di tarai na unda muchanan por siña pisca. Lo tin un boto di piscado pa esnan cu desea subi lama den lagoen y experiencia con dushi ta pa core den boto di piscado. Aruba Aloe lo ta na cero Alejandro, unda ainda tin un weya di antes pa herbe aloe, pa duna demostracion con ta corta aloe. Tambe lo tin demostracion con pa traha cas di torto y transhinan di antes.
“E meta ta pa rebiba nos pasado, tradicion y cultura pa tur hende por wak cu esaki ta nos y nos cultura cu nos tin cu continua cu ne. Apesar cu hopi aspecto no ta existi mas, pero mi ta kere cu ta importante cu nos ta na haltura di nan, pa nos hobennan sa di unda nos ta bin, nos rais. Esaki ta e parti central di henter e dia, pa cera conoci cu balornan cultural di Aruba, den e caso aki di Savaneta”, señor Thijsen a remarca.
Invitacion ta keda na ciudadanonan di Savaneta y na pueblo di Aruba en general, diadomingo awo, 7 di juni, cuminsando pa 10or di mainta, cuminsando na Funari cu e parti protocolar, Y despues por sigui na e otro 5 areanan di actividad den Savaneta. Lo tin busnan cu ta sali for di Funari pa hiba bishitantenan na e demas areanan.
