Diadomingo mainta tin bendemento di hopi articulo nobo y usa di Hotel

Pa yuda Fundacion Stimami Sterilisami

ORANJESTAD (AAN): Esaki ta bay bira e di tres biaha cu e ‘Sidewalk Sale’ ta ser organiza, y e siguiente ta Diadomingo awor, 8 di September 2024 y lo ta na un lugar nobo, esta New Chinese Club of Aruba.

   Esaki ta e evento anual “Summer Sidewalk Sale” di Fundacion Stimami Sterilisami.  DIARIO a compronde cu e lo cuminza pa 8:00 am, y finalisa pa 3:30 pm, of mas prome si acaso tur cos wordo bendi.  E biaha aki e benta lo bay ta riba materialnan usa di Hotel, pero tin algun nobo tambe.  Ademas 100% di tur entrada lo bay pa e programa di sterilisacion di cacho y pushi na Aruba.

   E aña aki, bo por spera un seleccion aun mas amplio di articulonan di hotel di calidad halto for di resortnan top como Bucuti & Tara Beach Resort, Hyatt Regency Resort, The Ritz Carlton, Marriott Vacation Club, y RIU Palace. For di mueblenan pa paden y pafo, te cu clechi di cama, tayo, glas, ekipo di buffet, y hopi mas, lo tin algo pa tur hende na prijsnan increibel.

   Subasta y Rifa Emocionante: Nobo e aña aki ta cu lo tin un subasta cu lo cuminsa 11’or di mainta. E subasta lo inclui un weekend stay na Hyatt Regency Resort, un cena na Ruinas del Mar, day passes na RIU, all-you-can-eat desayuno y lunch na RIU, passes pa Jolly Pirates, y mas sorpresa! Ademas, lo tin regalonan especial cu lo wordo rifa durante henter e dia. No perde bo chens pa haña e ofertonan special mientras cu bo ta sostene un causa importante.

   Adopta un Mascota: Amantenan di bestia lo tin e oportunidad pa topa cacho y pushi adorable cu ta cla pa adopcion for di organisacionnan local di rescate, incluyendo Luna Foundation, Sgt. Peppers Friends, AWAA, Nine Lives Foundation, Crijojo Trappers, Animal Shelter, New Life for Paws, Annie's Faith, Animal Rights Foundation, y PawsUni. E organisacionnan aki lo ta presente cu mascotanan cla pa adopcion for di 8:30 am te cu 11:00 am, y tambe cu stands pa drenta cu ta ofrece merchandize y articulonan pa bestia di One Love Foundation.

   Sostene un Causa Digno: Tur 100% di e fondonan recauda durante e dia lo wordo usa pa funda e campaña nacional di sterilisacion di Stimami Sterilisami, cu ya a sterilisa casi 38,000 cacho y pushi na Aruba. E trabou vital aki no ta posibel sin e apoyo generoso di nos donadornan, boluntarionan, y comunidad.

No perde e oportunidad increibel aki pa haña bon ofertanan, sostene bienestar di bestianan, y disfruta di un dia di union na comunidad. Nos ta spera pa mira bo dia 8 di September!

   Durante e actividad, lo bay tin bendemento di Tacos pa $1.