Lo tin Djampou tur caminda!
ORANJESTAD (AAN): Diadomingo awor, Centro di Pesca Spaans Lagoen ta organizando un Torneo entre e piscadornan balente di eynan, y e ta titula ‘Torneo Rey di Djampou’. E competencia aki ta den cuadro di celebracion di Dia di Himno y Bandera 2024.
Centro di Pesca Spaans Lagoen a pone e actividad aki pa Diadomingo 17 di Maart 2024. A cobra 35 Florin pa participante y lo permiti maximo di 4 piscado riba cada boto cu ta participa. E Torneo tin tur su regla y puntonan valido cu tur piscado tin di cumpli cune. Di e forma ey e Torneo #10 aki ta bay corecto sin conflicto.
Pa e Torneo, lo bay tin premionan atractivo pa tanto esnan den Boto grandi, y tambe premio pa esnan den Boto chikito. Lo tin premio pa esnan cu bin cu mas kilahe di Djampou. Lo tin premio pa esnan cu sali na di dos lugar y di tres lugar. Lo bay tin premio tambe pa esnan cu mayor ehemplar den e torneo, incluyendo e Djampou mas grandi, e Djampou hala geel, Conofes, Mulato, Picuda, Pisca Cora, Dorao, y Brasi.
