ORANJESTAD (AAN): Departamento di Cultura Aruba ta anuncia e di IV Encuentro Multicultural Aruba 2024 relaciona cu Celebracion di Dia Mundial di Diversidad Cultural pa Dialogo y Desaroyo Declara pa UNESCO.
Proyecto auspicia pa Ministerio di Cultura Aruba, presenta pa Departamento Di Cultura Aruba, Cuerpo Consular Aruba, Gruponan Folklore- Cultural estableci aki na Aruba y cu cooperacion cu ArtisA,
Tin 2 fecha pa realisacion di actividad cu ta separa di otro, na unda riba diadomingo 19 di mei lo tene e actividad Feria Gastronomico y Show Multicultural Aruba, na retonde di Kulture Cafe Aruba na San Nicolas, cuminsando cu invitadonan special di e proyecto Balia bo (Hi)storia di Filomena College Mavo, cuminsado pa 6:00pm te cu 7:00pm.
7:00pm ta cuminsa cu presentacion oficial di tur pais participante te cu 10:00pm y lo finalisa cu show multicultural te cu 11:00pm cu ambiente musical.
Ariba diamars 21 di mei cu ta dia di Diversidad Cultural, lo haci un marcha pa paz y unidad na unda na final tambe lo entrega e reconocemento na tur participante cuminsando for di 7:30pm pa 8:30pm
E dia aki, tur grupo lo hiba un mensahe di Paz Mundial cu lo documenta pa manda na UNESCO Internacional na unda tur participante ta refleha e balor cu Aruba tin como pais chikito capaz pa integra y cu ta para tambe pa paz y unidad.
E paisnan cu ta participa den e di 4 edicion lo ta: Aruba, Bonaire, Curacao, Argentina, Brazil, Caribe, China, Colombia, España, Hulanda, Italia, Philippines, India, Mexico, Pueru, Portugal, Republica Dominicana, Suriname y Venezuela.
Lo tin diferente tent di artesania y cuminda di entre otro: Aruba, Colombia, Hulanda, India, Italia, Jamaica, Peru, Philippines, Santo Domingo, Suriname y Venezuela.
E lema central na caminda pa celebracion di e prome lustro ta: “E rikeza di nos pais, ta nos multiculturalidad”
Bini un, bini tur, Entrada ta completamente gratis.
