Diadomingo atardi e dos yiunan di Heintje lo sali for di Mina di Fosfaat

ORANJESTAD (AAN): Diasabra dia 2 di October pa 5’or di atardi, e momento cu e ciudadano Heintje Ras a drenta oficialmente den e Mina di Fosfaat den Colony,

pa asina cuminza cu su hazaña di 100 dia eybao cu e meta pa recauda fondo y haci un Museo di Antiguedad Aruba bira realidad, el a bay tambe cu su dos yiunan teenager, esta Alzachary y Alzachayla.  Como cu ta October vakantie, nan a opta pa bay acompaña nan tata.

   Como cu e dos yiunan aki den pasado na numeroso ocasion a cana den e Mina di Fosfaat cu nan tata, nan conoce bon y tambe sa di tur protocol y reglanan pa mantene nan mes safe eybao.

   Eybao no tin coriente, ni aire fresco ta circula, y tampoco ningun señal di Celular, ni Wi-Fi, y tampoco VHF Radio no ta yega eybao.

   Pa seguridad, toch a bay cu un tent chikito pa asina e dos hobennan por a drumi aden den e 7 dianan cu nan ta keda eybao.  Pasobra Heintje mes no por drumi den tent.

   E dos hoben tabata yen di animo, ora cu DIARIO a bolbe bishita Mina di Fosfaat pa entrevista Heintje.  Tanto Alzachary y tambe Alzachayla lo sali bek Diadomingo awor, 10 di October pa 5:00 pm for di e Mina di Fosfaat.  Nan lo bay lagando nan tata su so eybao, pa e keda e resto di dianan cu falta pa e yega 100.  Pero tur dia boluntarionan ta bay eybao pa haci control di salud riba dje.

   DIARIO a compronde cu posiblemente e docentenan di scol di e dos hoben aki, lo bay tey presente pa mira nan sali.  Tambe tin invitacion a bay pa tur nan klasgenoot bay mira con e muchanan aki ta sali Diadomingo for di bao di tera.

   Nan tata, Heintje Ras ta activo cu un hazaña cu lo dura 100 dia, pa asina yuda pone Aruba su nomber na grandi den e Guinness Book of World Records.  Importancia ta e meta final di e hazaña pa logra su meta, pues pa haci un Mega Museo di Antiguedad bira realidad na Aruba.   Heintje mes lo sali bek te Diadomingo 9 di Januari 2022 despues di 5:00 pm.

   Si bo kier haci donacion, bo por haci esaki na Cuenta RBC Bank #77000001000257292.