Diabierna y Diasabra ta bay tuma lugar concierto ‘Biggy Boy Forever

ORANJESTAD (AAN): Diaranzon durante un conferencia di prensa na UNOCA a wordo anuncia cu Diabierna y Diasabra ta bay tuma lugar e concierto: ‘Biggy Boy Forever’.

Segun Mark Benson, e concierto mester a tuma lugar for di algun tempo pasa caba, pero debi na e pandemia e fecha a wordo hala.

“Hopi hende ta hopi entusiasma pa e concierto y esnan cu a cumpra ticket originalmente, a keda wanta esakinan en espera di e concierto”, segun Benson.

El a splica cu mirando cu na prome instancia e concierto tabata ‘sold out’ a pone un di dos fecha tambe, esta Diasabra.

Pa Diabierna e concierto pues ta sold out, pero ainda tin ticket pa Diasabra.

Biggy Boy y su banda lo presenta Diabierna y Diasabra, despues di cual lo tuma lugar tambe un after party.

Benson a sigui bisa cu e portanan di Renaissance Convention Center ta habri 8:30 di anochi, unda cu pafo e carchi ta wordo cambia pa un bachi cu ta dunabo acceso pa e fiesta henter anochi.

Pafo por cumpra tambe e tokens pa paden por cumpra cos di bebe y come.

E show mes ta cuminza entre 9:30 y 10’or di anochi y despues di e show ta bay tin un after party cu lo sigui te oranan laat.

 E concierto ta 16 aña pariba.

Jonathan “Biggy Boy” Thiel tambe a hiba palabra Diaranzon y el a bisa cu e ta den full swing di preparacion hunto cu director musical Tigre.

“Nos tin hopi tempo caba preparando”.

For di 2020 caba nos tabata preparando e show aki, pues aworaki nos a djis repasa e show y automaticamente den e 2 añanan cu a pasa nos a haya hopi mas idea, pues nos a expande e show y awor nos ta preparando den full swing pa duna e fanaticonan hopi nostalgia y pa nan biba e momentonan atrobe di Biggy Boy, segun Thiel.

E cantante a splica cu lo tin presentacion di diferente artista invita, incluyendo for di Hulanda, for di Boneiro y Corsow.

Tambe ta bay tin artistanan di Miami cu kier a bin wak e show.

“E ta bay ta un concierto super diferente”, segun Thiel, kende a indica cu e ta bay canta solamente e cancionnan di e tempo di Biggy Boy.