ORANJESTAD (AAN) – Diadomingo atardi, diferente ciudadano a tuma contacto cu DIARIO, pa expresa nan asombro, disgusto y preocupacion debi cu Diabierna cu a pasa, un auto tabata pita pafo y ora nan a sali wak ta ken,
a bin resulta cu ta un deurwaarder, cu a bin trece pa nan cobranzanan di belasting for di 2012 te 2015.
Diferente di e ciudadanonan aki ta personanan di 65 pa 70 plus cu na e momentonan aki nan ta biba di pension di behez so, mientras cu tin sumanan hasta di 20 mil florin pa paga, y cu nan no por compronde di unda DIMP ta saca e sumanan exorbitante ey, si semper nan a cumpli cu yenamento di declaracion y entrega di esaki na tempo.
Un di e personanan aki a tuma contacto Diabierna mes cu un hurista ken a bise pa yama DIMP, corda nan cu debenan cu ta wordo cobra cinco y mas aña despues di e aña cu a wordo haci, ta expira caba. E Hurista a bisa e ciudadano cu esaki tambe ta conta pa belasting y cu e ciudadanonan aki tin cu busca nan derechonan.
E sorpresa pa e ciudadanonan en cuestion a cay manera un baño di awa frio, y posiblemente awe DIMP lo haya nan yamada di reclamo. Y nan ta haya tambe cu net awe cu ainda Aruba ta den pandemia, cu tanto ciudadano a perde nan trabao, cu diferente famia ta depende incluso di e pension di behez di un tata of un welo cu ta biba cu nan, y awo ta yuda nan, pasobra ta unico entrada cu tin pa nan sobrebibi, y falta hopi pa bisa cu tur hende cu a keda sin trabao na Aruba door di e Covid-19, a bolbe subi e mercado laboral.
