George Winterdaal ta 35 aña den radio
ORANJESTAD (AAN): E popular locutor George Winterdaal mihor conoci como e omo di Aruba “Tio George” pa su sin fin di proyectonan dedica na nos muchanan ta celebra diabierna awor dia 6 di November su di 35 aña den e mundo di Radio Difusion y tambe ta celebra apertura di su programa di fin di aña esta “Fin di Aña Cumi”.
George a cuminsa den e mundo di Radio cu apenas 12 aña di edad y a traha cu EJ Croes Production pa casi 30 aña y 23 aña na Magic Fm y desde 1 April 2022 ta labora na Mas FM den su programa di tur mainta di 8’or pa 10’or cu ta “G on Air” y tambe durante fin di aña cu e programa navideño ‘Fin di Aña cumi”, cu tambe e biaha aki ta celebra su prome lustro.
Pa celebra e bunita ocacion aki diabierna awor dia 6 di November na Plaza Mas dilanti studionan di e emisora na Wayaca, lo tin un ambiente musical cu gruponan manera Melodia, Las Unicas y Muchanan di Mama Rosa. Tambe lo tin un tent di Ardi Snack cu Plato Navideño, Ham di Pasco, Sopi Carni, Suls, Spam y Pisca Tempera, Pan Yena, Aros con Pollo y tambe Maga’s Ponche y Fruit Punch. Boca Dushi tambe lo tey cu Bolo, Tert, Cosnan dushi manera Dulce de Leche, Dushi di Corn Flakes y mucho mas.
E programa na radio lo cuminza pa 6:00 pm. y e ambiente na Plaza Mas ta start pa 6.30 pm. Un palabra di pabien na George pa e bunita etapa aki y dese’e hopi mas pa e sigui deleita su oyentenan cu e bon programacion y un di e mihor bosnan di Aruba.
