Diabierna Centro di Bario Playa Pabao cu tremendo actividad pa Dia Internacional Mucha

ORANJESTAD(AAN): Relaciona cu Dia Internacional di Mucha cu ta 20 di November, Centro di Bario Playa Pabao ta organiza un tremendo actividad pa mucha Diabierna.

Presidente di e centro di bario Dennis Burke a splica Diaranzon cu e celebracion ta inclui cu na Playa Pabao e muchanan for di rond di 3’or di atardi por haci uso di un tremendo water slide di 20 meter, mientras cu ta bay tin tambe diferente trampolin y Dino Jump.

Tambe e muchanan ta bay tin e oportunidad pa haci face painting.

Burke a splica cu tur cos ta bay ta completamente gratis y e prome 200 mucha cu yega Centro di Bario Playa Pabo pa e actividadnan ta haya un tas cu algun recuerdo chikito.

E presidente a splica cu despues di 6’or e actividad lo cambia unda cu ta bay tin musica di brass band, mientras cu ta bay tin presentacion di solistanan hubenil y un grupo hubenil di baile.

Burke a gradici e representantenan di Hulanda na Aruba cu a yuda tambe cu organizacion di e actividad aki.