ORANJESTAD (AAN): Alexander Kraft van Ermel (1990) ta e nieto di e conocido compositor y pianista di Curaçao,
e legendario Wim Statius Muller. Ta p'esey semper Alexander tabata tin un conexion special cu musica di Antias. E tabata tin e privilegio di haya les di su abuelo for di chikito.
Na januari 2022 nos por a admira Alexander na Cas di Cultura caba cu piesanan di Chopin y Wim Statius Muller. Awor e lo back riba nos isla cu un concierto nobo. Awor e lo ta presentando composicionnan di Ludwig van Beethoven; Waldstein y Appasionata sonatanan. Por conta hopi di Beethoven, pero su nomber ya caba ta sinonimo cu musica clasico, como un di e grandinan di su tempo. Mas ainda ora realisa cu Beethoven tabata sordo, y a composita musica pa 28 aña ainda despues cu e'la bira sordo.
E Waldstein y Appasionata sonatanan ta e obranan mas popular for di su 32 sonatanan. Romanticonan Aleman ta nombra esakinan e obranan monumental cu a ta clausura e temporada clasico y introduci e era romantico. E obranan tabata muestra di "durf", tabata avansa y 'avant garde' pa nan tempo.
E sonata Waldstein tin e cambionan harmonioso cu John Coltrana a usa 250 aña despues den su composicion 'Giant Steps' y e sonata Appassionata ta duna e libertad y profundidad necesario pa exprecion emocional cu prome tabata falta den composicionnan.
Bin admira Alexander dia 16 di september pa 7:00 pm na Cas di Cultura. Ticket obtenibel na Cas di Cultura.
