Prome Minister Evelyn Wever-Croes:
ORANJESTAD (AAN): Prome Minister Evelyn Wever-Croes dialuna ultimo a anuncia cu desde dialuna 12 di september, 2022, a de-escala e fase di crisis y ta bay den fase di rehabilitacion cu lo dura te cu 31 di december di e aña aki. Crisis team no ta bay traha mas cu e landsbesluit, e decreto, ni e ‘ministeriele regelingen’ basa riba e ley di calamidad. E landsbesluit den cual a decreta Covid como un crisis, a wordo hala aden desde e fecha menciona.
Aruba a experencia 5 diferente ola di Covid. E prome ola a spera cu e lo a dal nos mas severo, sinembargo e tabata esun cu a dal minimalmente na comienso di 2020 na maart y april. Despues na augustus te cu november nos a haya un ola un poco mas grandi. Ora nos ta cerando aña 2020, el a bolbe cuminsa lanta cabes pero no a haya pieknan halto pero el a bay y bolbe cual a haci e ola number 3 mas largo, te na mei 2021.
Despues na juli 2021, e casonan a bolbe aumenta y esey tambe a causa problemanan cu mester a atende. Y e ultimo ola tabata Omicron cu a dal nos mas duro for di december 2021 te februari 2022 cu a afecta nos turismo hopi despues cu nos a cuminsa recupera. Despues di esey, danki na tur ciudadano, nos a logra pa baha esakinan y controla e cantidadnan.
Aruba a atende cu e Covid aki di un forma impresionante y sigur ehemplar pa hopi otro pais. Na principio Gobierno di Aruba hunto cu Crisis Team tabata den conferencia tur anochi pa duna informacion y despues a baha e frecuencia un poco. Tabata tin programanan special pa comparti mas informacion di nos profesionalnan cu henter comunidad.
A desaroya un Health App cu tambe ta ehemplar pa nos region. Aworaki cu Minister Dangui Oduber tabata den un mision cu Cas Real na Texas, e Health App aki a wordo menciona y Aruba a haya opi elogio pe.
E maneho di vacunacion, e vacunathon y e localidad di Sporthal cu tabata tin tambe a yuda hopi. Gobierno den e temporada aki no solamente mester a percura pa e aparato publico y semi-publico, pero Gobierno tambe a haci algo sobre-humano pa atende sector priva. Sector publico apesar cu no tabata tin entrada pa caha di Gobierno, Gobierno a sigui paga 83.4% di salario. Pa sector priva Gobierno a bin cu e proyectonan di FASE y Loonsubsidie pa por paga sikiera 60% di salario, pakete di cuminda y asina mas paketenan di estimulo y sosten.
“Probablemente esaki tabata e tempo mas dificil den nos historia y awo nos ta na e punto cu nos ta stop e uzo di e ley di calamidad y bay den fase di rehabilitacion te fin di aña. Pero di awor aki caba mi kier gradici tur nos profesionalnan y frontlinersnan cu a yuda nos den e periodo dificil aki, henter e Crisis Team y tur e clusters cu ta traha den Crisis Team, Gobierno di Aruba, coleganan minister pa e cooperacion, Parlamento di Aruba cu a mustra flexibilidad y resiliencia cu nos por a atende cu tur e topiconan delicado aki y henter e comunidad di Aruba pa bo comportacion ehemplar yudando nos pa por bringa e crisis aki. Aruba tabata un di e paisnan mas fuerte afecta segun IMF, pero nos ta un di e pais tambe cu ta recuperando mas fuerte na e momento aki y esaki ta danki na tur cu ta biba riba e pida baranca aki y e amor grandi cu nos tin pa nos pais. Porfabor ban sigui cuida”, Prome Minister Evelyn Wever-Croes a expresa.
