ORANJESTAD (AAN)- Mientras cu den ciudad na Oranjestad, negoshinan tabata completamente yen, Diabierna, cu no tabata tin mas lugar pa staciona auto, supermercadonan completamente yen, restaurantnan tambe, y ni papia mes di Caya Grandi, tristemente e area comercial na San Nicolas, y caya, tabata completamente bashi.
E contraste aki a capta atencion di hopi ciudadano cu a ripara esaki, y ta puntra kico ta pasando cu e economia pa loke ta e distrito di San Nicolas. E negoshinan no tin clientela? E consumidornan di San Nicolas ta bin te Playa pa haci compras? Of e situacion di e famianan ta hopi dificil cu no ta sali haci compras pa Pasco? Kico e reaccion di SNBA al respecto.
Ta conoci cu nan ta haciendo hopi esfuerzo pa logra progreso pa nan distrito, y tin hopi plan cu, obviamente, ainda no a concretiza. Ohala poco, poco pero cu paso sigur, e bonanza economico lo toca e distrito di San Nicolas y cu e luz na horizonte lo resplandece na aña 2023.
