Dia Pedagogico ta un dia hopi spera y aprecia pa e Trahadornan Pedagogico cu FPNM ta organiza pa 9 aña consecutivo

Janelle Artsen, consultant pedagogico di FPNM:

ORANJESTAD (AAN) — Janelle Artsen, Consultant Pedagogico na Fundacion pa Nos Muchanan “FPNM”, a declara den un entrevista cu DIARIO, cu e minister encarga a bisa cu e interes tey semper, pa e Trahadornan Pedagogico participa den e Dianan Pedagogico, cu pa nuebe aña consecutivo ta tumando lugar.

Artsen a expresa cu cada bez e acogida ta hopi mas grandi. E aña aki nan tabata “sold out” y mas bien cu mas di 30 persona riba lista di spera y nan mester a percura pa tur hende participa, pasobra nan tur merece di amplia nan conocemento, no importa si nan tin hopi experiencia den cuido y guia di mucha, pasobra semper tin cosnan nobo ta bin acerca.

El a agrega cu e trahadornan den veld tin hopi interes pa sigui siña y hopi biaha nan mes ta yama FPNM puntra cual tayer tin y si tin temanan nobo pa trata, locual ta algo hopi bunita pa cuida e muchanan hopi miho, loke ta e meta principal di Fundacion pa Nos Muchanan, pa crea un base firme, p’asina eleva nan mes den e Centronan di Cuido.

El a agrega cu e trahadornan aki ta pasa hopi mas tempo cu e muchanan y p’esey ta hopi importante pa nan no keda stagna, y toch nan haya e oportunidad di siña hopi cos, anto ta hopi importante pa duna nan e tayernan di trabao aki tur aña, y ora FPNM ta manda nan informacion ya caba nan ta prepara pasobra Dia Pedagogico ta na caminda.

“E interes tey y esaki ta algo cu nos ta keda haci, pasobra nos ta ripara cu nan kier esaki y nan merece, pasobra nan ta trahando duro y nan merece un dia special pa nan. Semper nos ta pone hunto cu algo practico y leuk, cu toch nan haya un regalito pa nan sinti cu nan trabao tambe ta haya e balor cu nan tin mester, pasobra nan ta haciendo un trabao duro y hopi pisa”, Janelle Artsen a subraya.