Tema pa 2024” “Ban traha hunto pa mantene bibo e humanidad”
ORANJESTAD (AAN) — Dia 8 di Mei ta wordo conmemora e Dia Mundial di Cruz Cora y cu ne ta celebra e accion humanitario riba tereno local y internacional.
Esaki ta un dia den cual ta honra e legado di Henry Dunant, boluntario cu a funda e Movimento Internacional di Cruz Cora, 160 aña pasa caba.
Riba tur cos, e ta un dia pa rindi homenahe na e miyones di boluntario y na e personal cu ta traha hunto pa e hendenan cu mester di proteccion, asistencia, servicionan di salud, ayudo social y solidaridad. P’esey e tema pa 2024 ta “Ban traha hunto pa mantene bibo e humanidad”.
Resumen di e mensahe di e Comite Internacional di Cruz Cora, di dia 7 di Mei 2024:
“Meymey di conflictonan arma y otro situacionnan manera violencia, desaster, crisis climatico, epidemia, inseguridad alimenticio y desplazamento masivo, den algun di e situacionnan di mas vulnerable di mundo, nos compromiso di yuda e demas personanan ta sigui firme. Den e temponan dificil, e emblemanan di Cruz Cora y di e Mitad di Luna Cora, cu nos ta hiba ta simbolonan poderoso cu ta priminti proteccion na e personanan cu mester. Su reconocimento universal ta imprescindible pa yuda proteha e boluntarionan y e personal di henter mundo den nan labor di scapa bida. Mente e neutralidad y imparcialidad di e accion humanitarian ta primordial y ta permiti nos ekiponan accede na e comunidadnan den crisis mas isola y amenaza.
Apesar di e gran cantidad di reto cu ta competi pa nos atencion y recursonan, nos ta comprometi na sigui pone di relieve e crisis lubida na tur parti di mundo. Den un epoca di polarizacion, y deshumanizacion, cu ta afecta diverso grupo, entre nan e migrantenan, comunidadnan bisiña y incluso e trahadornan di prome auxilio, nos movimento ta busca fortalece e principio basico di humanidad, specialmente den e lugarnan unda ta mas esencial pa garantiza e bienestar y dignidad di e personanan cu ta sufri necesidadnan”.
DIARIO ta expresa palabranan di pabien y danki na Cruz Cora di Aruba, cu semper ta atento enberdad pa brinda un man, na unda cu ta necesario y bao cualkier circunstancia. Dios duna nan semper e forza necesario pa cumpli cu e bunita mision humanitario cu nan ta desplega.
