ORANJESTAD (AAN): Dia Mundial di Creatividad y Innovacion a ser conmemora April 21 y a enfoca riba e papel cu industrianan cultural y creativo
ta hunga den nos economia local y global y alavez den e procesonan pa soluciona problemanan cu nos ta encontra pa yega na un desaroyo sostenibel.
E industrianan cultural y creativo ta encera publicidad, architectura, diseño, buki, gaming, fotografia cinematografia, musica, corant/revista, bellas artes, radio, television y arte visual.
No tin un interpretacion universal di e concepto di creatividad. E concepto por ser comprendi di cubri e spectrum di expresion artistico te cu soluciona problema (problem-solving) den e contexto di desaroyo economico, social y desaroyo sostenibel.
Pesey Nacionnan Uni a designa April 21 como Dia Mundial di Creatividad y Innovavion pa eleva e concientisacion pa e papel cu creatividad y innovacion ta hunga den tur aspecto di desaroyo humano.
Inverti den nos Planeta: Esaki ta e momento pa nos cambia tur cos: E clima corporativo, e clima politico y con nos ta maneha e accion necesario pa tuma pa atende cu cambio climatico. Awor a yega e ora pa mustra un curashi imparabel pa preserva y proteha nos salud, nos famiya y nos medionan di subsistencia.
Pa Dia Di Tera 2022, nos mester actua cu balentia, innova (ampliamente) y implementa den un forma equitativo. Esaki ta bay requiri nos tur pone man hunto y actua, cu tur hende haciendo e compromiso pa un dedicacion completo. Empresenan, gobiernonan y ciudadanonan- tur hende inclui y tur hende responsabel. Un partnership pa Planeta Tera.
Creaccion di Science, Technology and Innovation Platform Aruba: Awe Dia Di Tera 2022, cu e tema “Inverti den Nos Planeta” tres fundacion na Aruba a crea Science, Technology and Innovation Platform Aruba.
E tres organizacionan ta Natural Care Aruba Foundation, International Teleport Aruba Foundation y Institute for Industrial Development Aruba Foundation.
Den un Memorandum of Collaboration nan ta delinea cu e plataforma cu tin un “open and flat network structure” di un comunidad innovativo (innovation community) lo utiliza e quadruple y quintuple helix models di Union Europeo pa desaroyo economico y social local, regional y internacional acopla y sincroniza na e Sustainable Development Goals di Nacionnan Uni.
E areanan di colaboracion lo ta ciencia fundamental, investigacion y desaroyo di ingenieria y ciencia aplica, ciencia abierto y inclusivo, incluyendo citizen science y entorno di innovacion ( startup accelerators, incubators y parke cientifico y tecnologico).
Lo enfoca riba e siguiente Sustainable Development Goals: Bon Salud y Bienestar, Educacion di Calidad, Awa Limpi y Sanitacion, Energia Berde y Pagabel, Trabao Husto y Crecemento Economico, Industria, Innovacion y Infrastructura, Ciudad y Comunidadnan Sostenibel, Consumo y Produccion Responsabel, Accion Climatico, Bida bou Awa, Bida riba Tera y Partnerships pa SDGs.
Cinco area tematico transversal a ser identifica pa ciencia, tecnologia y innovacion: (1) Salud, trabao, bienestar y envehecimento. (2) Maneho di recurso natural y renovabel (awa, energia, desperdicio, agricultura y biodiversidad). (3) Ciencianan biologico y medico. (4) Economia di conocimento, infrastructuran digital, inteligencia artificial, e Internet of Things. (5) Ciencia y tecnologia espacial, incluyendo robotica, sensor remoto y tecnologianan autonomo.
Riba e mesun dia di Dia di Tera a invita Rainbow Warriors Core Foundation pa forma parti di e plataforma, pues awor tin cuater fundacion participando y e intencion ta pa establece relacionan cu empresa, organizacion, y investigador academico y studiante for di e siguiente gruponan defini pa Nacionnan Uni: Agricultor, NGOs, Comunidad Cientifico y Tecnologico, Negoshi y Industria, Trahadornan y Sindicato, Hende muher, Hubentud y Hende grandi, Personan cu discapacidad, Educacion y mundo academico. Interesadonan cu kier colabora of patrocina nan, por contact nan na:
This email address is being protected from spambots. You need JavaScript enabled to view it.
DIARIO ta felicita nan cu e campaña aki!
