ORANJESTAD (AAN): Diasabra 26 di april, na ocasion di Dia di Rey, Aruba a celebra cu orguyo e cumpleaños di Su Mahestad Rey Willem-Alexander.
E ceremonia protocolar a tuma lugar den un ambiente di alegria mescla cu reflexion, mirando tambe e despedida di un gran lider spiritual, Papa Francisco. Prome Minister Mike Eman, a duna un discurso inspirado, den cual a expresa cu awe nos ta biba cu dos sentimento profundo simultaneo: alegria pa celebra nos Rey y tristesa pa despedida di un Papa cu su guia spiritual a ilumina mundo henter.
"Awe para akinan nos ta busca e sentido comun cu ta haci e dos momentonan aki uno den cual nos por haya un fundamento cu ta basa riba e mesun refleccion y profundidad. Awe e despedida di Papa Francisco ta e despedida di un personalidad cu den tur momento a duna den tur sinceridad, un forma cu un peregrino por a duna balor y guia un compas moral na nos comunidadnan rond mundo".
E discurso a pone enfasis riba e rais comun entre celebracion y despedida: fe den nos Creador, union di comunidad, y compromiso pa cuida y guia esnan mas vulnerabel. E mensahe a reforsa e balornan cu ta tene nos pueblo den bon relacion cu Cas Real. Prome Minister a conclui su mensahe cu un apelacion pa celebra cu alegria, pero tambe cu humildad y gratitud, reconociendo nos responsabilidad como comunidad uni, tanto na Aruba como den Reino Hulandes.
"Ban celebra cu alegria den nos curason, pero tambe cu honor y dignidad na nos Papa cu nos ta despedi di dje awe, cu e sentido cu tur locual ta duna merito na dje awe ta locual nos creador a duna nos riba e mundo aki pa duna nos guia y e compas moral pa por cana e miho caminda pa nos pueblonan."
Durante e ceremonia, a tuma momento pa honra nos hobennan sobresaliente den deporte y den nos comunidad pa nan contribucion remarcabel. A haci entrega di e Copa Hubenil Gobernador Felipe B. Tromp na e hobennan aki y lidernan cu a guia e hobennan aki. Esaki ta un homenahe na e futuro di Aruba den cual nos tin e obligacion pa inverti. E hoben Richard Tromp di 18 aña a bira ganado di e Copa Hubenil Gobernador Felipe B. Tromp 2025. Den categoria di premio pre-hubenil, esta di ocho pa diesdos aña e premio di estimulo ta bay pa Melaiska Woodley.
Den categoria hubenil tin cuatro hoben cu ta ricibi e premio di estimulo, nan ta Phelan Tromp y Rashid Ruiz di Grupo Scout San Dominico, Christianne Semerel di Grupo Scout Santanero y Jaylan Ridderstaat di Grupo Scout St. Paulus Michael. Debi cu aña pasa Kailen Wouters no por tabata presente a otorga awor si e premio di estimulo categoria pre-hubenil 2024 durante e ceremonia di e aña’ki.
Despues di e presentacionnan cultural, Prome Minister a acompaña S.E. Gobernador Alfonso Boekhoudt y demas invitadonan na e desfile vibrante di gruponan di scouting, cu ta representa nos hubentud, disciplina y speransa pa futuro. E ceremonia di diasabra ta reafirma cu Aruba, den fraternidad cu Reino Hulandes y guia pa balornan di fe y liderato moral, ta cla pa enfrenta futuro cu speransa y determinacion.
{gallery}Dia di Rey tabata un celebracion di union, alegria y reflexion{/gallery}
