Dia di Betico 25 Januari

Desde aña 1989, riba dia 25 di januari di tur aña, Aruba ta celebra Dia di Betico.

A scoge pa e fecha aki como cu ta e fecha di natalicio di e gran estadista Gilberto François (Betico) Croes.

Di e forma aki Aruba por dune su homenahe bon mereci y asina un y tur por keda recorda su lucha pa a logra Aruba su Status Aparte.

Ken ta Betico:

Gilberto François Croes, cariñosamente yama Betico, a nace na Aruba dia 25 di januari 1938 y a fayece dia 26 di November 1986. E tabata casa cu señora Glenda Croes y e tabata tata di 4 yiu.

Despues di su carera escolar Betico a sigui su estudio na Hulanda na unda el a logra su diploma di maestro di scol. Durante su estadia na Hulanda e tabata masha activo mes den diferente organisacion Antiyano. Ora cu Betico a regresa Aruba el a bay traha como maestro na Colegio San Hose na Santa Cruz y despues di a logra su diploma “LO Spaans y Handelskennis” el a bai traha na Colegio San Antonio.

Na Aruba tambe, mescos cu na Hulanda, e tabata masha activo riba tereno deportivo, musical, cultural y social. Na aña 1967 el a drenta arena politico como un candidato riba lista di AVP y e mes un aña a eligie como miembro di Conseho Insular di Aruba. El a fungi como diputado di educacion. Despues cu a surgi un diferencia di opinion fundamental den AVP, Betico a funda, dia 9 di februari 1971, su mes un partido politico Movimento Electoral di Pueblo (MEP), di cual e tabata e lider.

Betico den su carera politico nunca a acepta ningun puesto politico sino solamente a fungi como Consehero General di Gobierno. Desde e tempo ey Betico a hiba un lucha feroz pa Aruba logra su Status Aparte. Na mei 1985 Parlamento Hulandes a acorda pa haci cambio den Statuut pa asina Aruba drenta su Status Aparte dia prome di januari 1986. Esaki Hulanda a mara na condicionnan bastante estricto.

Esun mas estricto tabata cu Aruba por haya su Status Aparte na 1986 pero mara na un independencia den 10 aña. Betico a acepta e reto aki y tabata di opinion cu despues por haci cambio den esaki.

Desafortunadamente Betico no a haya e oportunidad pa goza di e Status Aparte di Aruba, despues cu el a haci tanto esfuerso, lucha y sacrificio pa logra esaki.
Dia 31 di december 1985, pa 9’or di anochi, solamente algun ora prome cu Aruba a bira un pais autonomo den Reino, el a sufri un accidente di trafico cu a lage gravemente herida. Despues di a keda 11 luna den coma Betico a fayece na Hulanda riba 26 di November 1986.

E pueblo Arubano nunca por lubida e palabranan historico di e gran homber aki: “Si mi cai na caminda, gara e bandera y sigui cu e lucha.”

Danki na e lucha di Betico awe Aruba ta un pais autonomo den Reino, cu su propio Gobierno, su propio bandera, su Himno, su propio escudo y moneda.

Betico a mustra nos e balor cu nos isla ta posee. Awor nos tur ta bisa cu nos ta Arubiano enbes di Antiyano. Betico a trece un union den nos pueblo y a kibra cu tur sistema descriminatorio cu tabata existi antes. Awor ta un grupo nos conoce y esey ta e grupo di Aruba. Tur hende ta igual y tur hende por biba feliz aki na Aruba, sin pensa ariba grupo o raza. Betico a mustra nos e importancia di e lucha di nos pueblo. E lucha aki a marca historia di Aruba.

E dia nacional 25 di Januari a bira un dia riba cual e pueblo ta sinti cu en realidad e dedicacion ta na un gran figura cu e pais Aruba a produci, Betico Croes.
Un feliz dia di Betico.