ORANJESTAD (AAN): Carlos Martinus for di aña pasa November ta na cabez di OAA(Openbare Avondleergangen Aruba) y el a haya e tarea di cuminza cu e opleidingen, despues cu OAA tabata tin 3 aña cera.
“Nos a cuminza cu un opleiding ‘Leerwerktraject’ cu ta cabando e aña aki, cu ta un opleiding di 1 aña”.
Nos a cuminza cu dos opleiding riba nivel dos, MBO 2, cu ta koeltechniek y elektrotechniek, cu ta bay tin un duracion di entre 1 aña y mey y 2 aña, segun Martinus, kende a indica cu e ta premira cu tin alumnonan cu ta bay caba e opleiding den 1 aña y mey.
El a indica cu OAA a cuminza tambe cu ‘entrée opleiding’.
“Ora cu nos a cuminza na October, lastimamente nos tabata tin 100 aplicante, di cual 50 nos mester a manda cas sin duna nan scol”.
Mirando cu nos ta enseñanza cu mester duna un di dos oportunidad na hende, nos a realiza cu asina nos a faya.
Nos mester a cambia di pensamento y bay di nivel 2 pa nivel 1, cu nos ta yama entrée opleiding, segun Martinus, kende a indica cu a cuminza cu entre opleiding ‘dienstverlening’.
El a splica cu ta cuminza cu 18 pa 19 alumno y awor ta bay tin mas opleiding di nivel 1 den futuro.
Pa e proyecto cu ta na caminda, tur hende di 17 aña pariba por participa.
A scoge pa un ambiente digital, unda cu tur material ta bon for di Hulanda y ta acredita pa instancianan Hulandes pa e diplomanan di OAA tin validez.
“Nos lesnan ta bay ta ‘dual’, esta na Papiamento y Hulandes, mientras cu e examennan si ta keda na Hulandes”.
Nos kier pa nos alumnonan tin place, practica y perspectiva, cu ta e tres “p”-nan di OAA, segun Martinus.
El a splica cu via e entrée opleiding bo ta bira un alumno cu ta bay asisti na e persona cu ta ehecuta e ofishi.
Despues cu bo caba e opleiding, automaticamente bo por bay na nivel dos.
Den futuro lo bay pa nivel 3 y 4 tambe, segun Martinus.
El a splica cu e aña aki lo cuminza cu 6 entrée opleiding, esta Asistent Dienstverlening, Asistent Bouw Woning en Onderhoud (handyman), Asistent Verkoop Retail, Asistent Mobiliteitsbranche (trabao na lugarnan di auto), Asistent Metaal, Elektro & Installatie Techniek y Asistent Horeca & Voedingindustrie.
Martinus a splica cu ta bay tin dos anochi di informacion, esta riba 5 y 7 di Juni di 6:45 te cu 8:30 na EPB Hato.
