Rish-Ann Ammerlaan, Trahado Social di FCVR
ORANJESTAD (AAN) Durante un entrevista cu DIARIO, señora Rish-Ann Ammerlaan, Trahador social di Fundacion Contra Violencia Relacional (FCVR), a bisa cu e fundacion ta haci diferente actividad, durante nan campaña.
Pa e aña aki tin diferente actividad cu FCVR a planifica y ta bay tuma lugar. El a cuminza na menciona cu manera tur aña nan tin nan “Straat Collect” cu lo tuma lugar dia 29 di November awo, y e dianan 6 y 13 di December venidero, unda cu hunto cu nan boluntarionan nan lo bay ta riba diferente ruta, bisti na Uniform Biña.
“Corda aporta; esaki sigur ta bay pa nos operacionnan diario, pa por sigui brinda e sosten y ayudo cu nos ta brinda na nos clientenan. Esnan cu kier ta boluntario y yuda FCVR den e collect aki por contacta nos, indica cu bo kier bira un boluntario y yuda nos recolecta na diferente area di Aruba”, señora Ammerleen a indica.
E ta encurasha cada persona pa tin cash riba e dianan menciona p’asina por aporta na nan causa.
“Tambe dia 5 di December, na MFA Paradera, nos tin un actividad cu yama ‘art for change’ cu manera e palabra mes ta bisa, nos pa medio di arte kier trece cambio. E actividad aki ta destina pa e comunidad di Aruba, pa tur persona desde edad di 15 aña pa edad di adulto, cu ta desea di participa”, e dama a menciona.
Pa participa lo mester registra. E fundacion tin un link riba Social Media cu por subi, tin un QR code cu bo por inscribi pa no keda afo. “E ta un actividad hopi interesante y hopi informativo tambe, cu pa medio di arte nos por haci hopi cambio, y mustra con e violencia por wordo transforma den resiliencia. Tambe, dia 10 di December, nos lo ta lanzando nos prome short film, cu ta mustra un sobreviviente na momento cu e ta wordo maltrata. Di esaki nos lo duna mas informacion riba nos medionan social den e dianan venidero y durante e campaña completo nos lo ta dunando informacion na comunidad di Aruba. Y sin lubida, nos tin nos Social Media Campaign, cu boso por wak riba nos medianan social, pa nos bira conciente mirando cu e tematica di ‘Orange the World’ e aña aki ta Violencia Digital”, señora Ammerlaan a menciona.
