Dia 24 di Juni nos ta celebra dia di San Juan

ORANJESTAD (AAN)- Awe hopi esnan cu ta stima nos cultura y tradicion ta celebra Dia di San Juan cu un fiesta di Dera Gai.

E celebracion aki ta wordo celebra for di ciclonan pasa y cu añanan esaki ya no ta wordo celebra na grandi mas manera custumber.

  Nos bieunan ta conta cu aki na Aruba, den pasado, e cunukeronan tabata warda tur e tronconnan di nan cosecha anterior, manera palo di maishi, rama y otro tipo di palo, pa kimanan riba dia di San Juan cu ta wordo celebra dia 24 di Juni.

  E tradicion di antes tabata cu nan tabata cuminsa cende candelanan grandi bispo di San Juan, esta dia 23 di juni. E kimamento mes tabata simbolisa purificacion, core cu tur mala suerte y pa por tin un mihor cosecha. Na fiesta di San Juan mes tabata tin cierto weganan manera bulamento di candela, bailamento,
cantamento, contamento di storia, leyenda y chasco, tur esaki tabata sosode rond di e candela.

Hopi cunukero tabata cende candela, tanto bispo di San Juan, como dia di San Juan mes.
Fiesta di San Juan tabata algo grandi na Aruba. Mayoria di e pueblo no tabata traha riba dia di fiesta di San Juan. Parti di atardi, ora cu ta cuminsa bira un poco skur, e fiesta ta cuminsa. E tradicion di dera un gai bibo ta algo comun den e epoca di antaño. Awendia dera un gai bibo no ta permiti mas.

 Historia ta indica cu e fiesta di San Juan a origina na e parti sur di Mexico despues pasa pa Guatemala y otro paisnan Centro Americano, yega te Venezuela pa despues ser treci Aruba unda el a keda un tradicion te dia di awe.

Na Aruba ta celebra e fiesta di San Juan na un manera unico.
E fiesta di San Juan na paisnan Latino tin hopi di haci cu supersticion. Antes e Indiannan tabata kere den varios Dios y spirito.
Ta bon conoci cu e Indiannan tabatin temor pa esakinan. Ta pesey nan tabata contenta nan cu ofrenda y fiesta.
Un di e fiestanan aki tabata e fiesta di agricultura na ocasion di cosecha. 

E baliamento

Riba e dia aki e mucha muhernan ta bisti un strik geel den nan cabei y nan saya ta largo y color geel.
E musiconan tambe tabata bisti un banchi geel of cora. E grupo musical tabata consisti di un of mas fio, tambor of tambu, wicharo of wiri y di un pregonero of cantante. Un cachete di burico tabata ser usa algun caminda na lugar di maraca. Un cantante tabata pregona y tur presente tabata canta e refran. Prome cu e cuminsa baila y busca manera di dal e gai, un persona ta mara un lenso na wowonan di un persona y ta draai e algun biaha rond, te ora e perde tur sentido di direccion.

Segun e bailado of matado di gai ta purba di dal e gai cu ta dera den tera (awor nan ta usa un calbas seco), e musica ta resona keto bay y cada bez cu e hera e gai ta hopi harimento y diberticion tin. Pues e publico presente semper tabatin ratonan sumamente dibertido.

Cada biaha cu e palo toca tera un oportunidad ta bay perdi.  Bailadonan di experencia tabata sigui e biento pa nan sa unda mas o menos nan ta para. Tambe e bailadonan ta schuif nan pia abou na suela buscando e gai, pasobra no mag di fula e tera cu e palo. E custumber ta cu cada bailado por purba tres biaha pa dal e gai. Si tres biaha bo faya, anto ta bin un otro bailado bin purba. Tres oportunidad pa dal e gai ta relaciona cu e gai cu a canta tres biaha segun biblia ora cu San Pedro (y no San Juan) a gaña cu e no conoce Hesus.

  Na Santa Cruz un par di cien aña pasa un cambio basico a tuma lugar.

Aki e no a usa un gay bibo pero a uza bandera di diferente colo; cora, blanco, blauw, berde y un bandera geel cu rand cora.

E bandera aki ta bandera di San Juan. Ta tapa wowo di tur e participantenan y despues ta pone e banderanan riba un mesa segun cantidad di e participantenan. Bailando e participantenan mester purba di gara e bandera di San Juan despues di un señal.

Esun cu coi e bandera di San Juan ta bira e ganado. E bentaha di e forma aki ta cu por haci e wega aki paden sin mester preocupa pa scuridad of si awa yobe. Pasa un feliz dia di San Juan awe  y por bishita diferente barionan pa disfruta di e celebracion di Dera Gai.